S’est bociu s’omini de setantadus annus chi in Monterey Park, in sa California, at mortu dexi personis, chi andaiant de is cincuan’annus a is sessanta, in d’unu aposentu aunia si baddat e in segus est imbucau in d’unu atru locali aunia sa genti chi si ddue agataiat nde dd’anti leau is armas. S’omini, a pustis, s’est fuiu cun d’unu furgoncinu.
Est un’atru sciolloriu chi sussedit in is Stadus Unidus. Custu machimini est cumentzau in sa citadina, chi s’agatat a trexi chilometrus de Los Angeles e est bivia in parti manna de genti lompia de s’Asia, biora de is dexi de sabudu a merì. Is caminus funt totus bestius a festa po saludai s’Annu de su lepuri e genti meda, a migliaias de averas, fut passillendu.
Huu Can Tran est imbucau in su Star Ballroom Dance Studio cun d’unu fosili, po cussu chi est nendu calencunu de sa politzia, finas chi a immoi non ddu est una relata uficiali, e at bociu cinc’ominis e cincu feminas. Atrus dexi ddus at lantiaus e s’agatant in su spidali.
A pustis su bocidorgiu in cuss’aposentu Can Tran s’est stesiau de tres chilometrus in Alhambra, imbuchendu in d’unu atru locali de cinesus, su Lai Lai, cun d’una arma diversa de cussa umperada in Monterey, forsis una pistola, ma is clientis, cun coragiu e sanguni fridu, ddu ant frimau e nde dd’ant liau s’arma. Is segus est fuiu cun d’unu furgoncinu arvu e at fatu cincuanta chilometrus a innanti de atobiai, in Torrance, sa giustissia. Is ominis de sa politzia dd’ant pediu de bessiri de sa machina e, in segus, ant intendiu unu corpu de arma. A pustis de un’ora ant segau is birdis de sa machina e ant agatau su corpus de Huu Can Tran chena de vida.
Sa morti sua immoi rendit prus dificili is arregionis de su machimini. “Sigheus dogna caminu”, at nau su scerifu de sa contea de Los Angeles, Robert Luna.
Sa comunidadi asiatica de is Stadus Unidus, in is urtimus tempus, at tentu a eita biri cun bocidorgius, su peus su 16 de martzu de su 2021, candu ant bociu otu personis, ses de is cali feminas, in Atlanta.
Su presidenti americanu Joe Biden at nau de essiri a su costau de is familias de is mortus e at donau ordini de ponni is bandelas a metadi de is bestonis in totu is edificius pubricus de is Stadus Unidus.
Màuru Mura
Lunis, su bintitres de gennargiu de su 2023
Foto: https://www.ansa.it/sito/notizie/mondo/nordamerica/2023/01/23/strage-al-capodanno-cinese-in-california-il-killer-si-suicida_fbb4140b-917c-4cb1-8ae6-00915f41beed.html
