Dominigu otu e lunis noi de làmpadas sa genti italiana est lamada a donai una spusta a is cincu preguntas de is Referendum, apariciaus de sa Corti Costitutzionali: cuatru pedius de sa Cgil, chi pertocant is chistionis de su trabbagliu po ponni a un’ala calncuna parti de su Jobs Act, su de cincu, pediu de +Europa, iat a serbiri po fairi prus a sa lestra in sa chistioni de sa citadinantzia italiana.

Dominigu is logus aunia s’at a votai ant essi obertus de is seti de mengianu finas a is undixi e lunis, invecias, sempiri de is seti ma finas a is tres de pusti prangiu. Su matessi est po is ses Cumunus sardus e is Cumunus italianus chi ant a votai po sfairi sindigu e consigliu comunali nou.

Is referendum funt totus po nci stupai sa lei de a innantis e benit pregontau a is citadinus chi disiglint ponni a un’ala una lei o una parti de sa matessi. Ponendu ca “giai” bolit nai ca si disigliat cancellai e chi si ponit ca “nou” bolit nai ca totu andat beni comenti s’agatant is chistionis.

Po fairi balliri su referendum iant depiri andai a votai su 50% prus unu de cussus chi ddu podint fairi. Chi unu andat a votai, ma no arretirat sa scheda, comenti at nau de fairi sa presidenti de su Guvernu Giorgia Meloni, no at essi contau in is votantis e duncas no at a serbiri po su “corum”. A intru de su segiu est finas de nai ca si podint arretirai, sceberendu, de votai feti po una, duas, tres, o cuatru chistionis.

Custas, a dogna manera is cincu chistonis:

  • Boleis a candellai su d.lgs 4 de martzu de su 2015, n.23?
  • Boleis cancellai s’articulu 8 de sa lei 15 de triulas de su 1966?
  • Boleis cancellai s’articulu 19 de su d.lgs 15 de làmpadas de su 2015?
  • Boleis cancellai s’articulu 26, coma 4, de su decretu de lei 9 de arbili de su 2008?
  • Boleis cancellai s’articulu 9, coma 1 litara b, f de sa lei de su 5 de friargiu de su 1992?

 

 

 

Màuru Mura

 

 

 

Giobia, su cincu de làmpadas de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://consboston.esteri.it/it/news/dal_consolato/2025/04/referendum-abrogativi-dell08-09-06-2025/