In nemancu ses oras 2.600 prenotatzionis. Funt custus is numurus de is domandas po su vacinu contras de su Covid po is pipius chi andant de is cincu a is undixi annus. E ant giai cumentzau a fairi su vacinu de eriseru, cun s’Open Day in Casteddu, de is duas a is seti de merì, si funt presentaus in trexentus.

“Una dì de importu mannu po totu sa Sardigna, chi sinnat aici un passu a innantis in sa bataglia po binciri su virus. Coragiu meda ant tentu is pipieddus, puntus oi po sa prima borta, e responsabilis ateretantu is babus e is mammas. Is pipius no ant timiu, ca teniant a ita biri cun dotoris e infermieris cun professionalidadi e coru mannu. Arregodaus ca su vacinu est su solu chi nosi podit agiudai contras su Covid chi sighit a essiri un’amelessu po totus”, at nau su presidenti de sa Regioni Christian Solinas.

“Unu cumentzu positivu de averas. Nosi fait unu prageri mannu finas a essiri partius in s’ora chi iaus decidiu. Totu is numurus nosi faint nai ca depeus sighiri a tenni atentzioni sempiri manna ca su virus est mudendu. Is numurus de sa pesta nosi faint cumprendiri ca su vacinu est de importu”, narat, invecias, s’assessori de sa sanidadi Mariu Nieddu.

In su mentris su spidali de Is Mirrionis torrat a oberri is jannas a is malaidus de Covid. Po s’ora feti in is aposetus de sa Geriatria. “Sa spera – narat su diretori Sergiu Marracini – fut cussa chi non ci fessit prus abisongiui, invecias imoi funt sempiri de prus is impestaus. Bolit nai ca in su benidori meda acanta sa situatzioni iat arrechediri de nosi tenni prontus”.

Is numurus de is impestaus funt sempiri in artziada, massimamenti chini no at fatu su vacinu e sa genti prus debili. A pustis su sartu de mercuris passau, cun 250 impestaus nous, eriseru su bulletinu regionali chistionaiat de atrsu 294 impestaus. In totu, po s’ora, funt in seti in is terapias inntensivas e in 118 in is atrus aposentus.

 

 

 

 

Màuru Mura

 

Foto: https://tg24.sky.it/salute-e-benessere/2021/05/17/vaccino-covid-open-day