Su Casteddu ddu at torrau a fairi. A suta po 0-1 a su corantotesimu minutu de su tempus de dus cun su Sassuolo at bortulau totu cun is atacantis Lapadula a su minutu de corantanoi e Pavoletti a-i cussu de cincuantatres e si pigat una vitoria chi fait amachiai.
Is scuadras funt partius, comenti si narat, a sprigu, est a nai cun cuatru difensoris, dus giogadoris a metadi campu e in tres in palas de su solu atacanti. A su cumentzu su Sassuolo est stetiu prus perigulosu meda, difatis su portieri casteddaiu Scuffet at fatu una pariga de paradas, comenti cussa a su minutu de cincu candu Henrique at tirau de conca e a pustis un’atru tiru de Vina pariat chi ce dd’essit acabada in gol. A pustis a su minutu de seti, scuffet, s’est depiu arrendiri a su corpu de conca de Erlic. Su Casteddu finas a-i cussu puntu non iat fatu nudda de averas.
Tandu Maistu Ranieri at cicau de ponni is piciocus in diversa manera, difatis Nandes est andau a giogai in su centru de su campu e Oristanio prus acanta de Lapadula. Is casteddaiuas aici pariant meglius e si cumprendiat de una filera de tirus de su corrunconi de su campu. Consigli, su portieri de su Sassuolo, s’est sarvau de su corpu de conca de Prati, gratzias a s’agiudu de Castillejo. A dogna manera su tempus de unu est acabau po 0-1.
Si torrat a cumentzai, a pustis unu cuartu de ora, cun is matessis giogadoris, ma a pustis Ranieri fait imbucai Pavoletti cun Luvumbo po fairi bessiri Sulemana cun Nandez. Cussu chi at cambiau sa partida est ca su Sassuolo est abarrau in dexi, candu s’arbitru c’at stupau a Tressoldi. Ranieri si giogat su totu po totu e fait imbucai Shomudorov, Mancosu e Petagna. E su Casteddu lompit a su 1-1, gratzais a sa barra de Luvumbo chi piscat in area a Lapadula chi fait gol. Iat a podiri bastai, invecias Pavoletti fait allirgai totu sa Domus cun d’unu gol de spantu.
Màuru Mura
Martis, su doxi de mesi de Idas de su 2023
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=T5IgrXC4gt4
