“In Italia tocat a nai totu cussu chi est sussediu e tocat a esssiri crarus a inantis de votai. Is italianus depint sciri chi partidus politicus de custu Stadu apant pigau dinari de una potentzia, sa Russia, chi oi est contras de s’Europa e chi at, non tocat a si ndi scaresciri, invadiu s’Europa. Duncas nosu pedeus a su Guvernu italianu de donai is novas e chi su Copasir facat sa parti sua”.
Aici at fueddau su segretariu de su Partidu Democratigu Erricu Letta, apustis sa nova lompia e unu documentu, chi totus podint ligiri, de is Stadus Unidus, aunia si narat chi sa Russia apat donau prus de trexentus milionis de eurus (ma si chistionat de meda de prus) a partidus e politigus de sonumancu binticuatru Stadus strangius.
“Est de importu mannu – at aciuntu su “leader” de is dem – chi sa genti scipat chi ci funt stetius partidus politigus chi ant pigau is partis de sa Russia poita pagaus de sa Russia etotu in totu custa operatzioni de invasioni”.
Letta, abistamenti, non fait nominis, ma in su Partidu Democratigu is nominis de is partidus suspetaus de airi pigau dinari de is russus ddus fait, est a nai, Mateu Ricci, coordinadori de is sindigus Dem: “Est de annus chi sa Russia cicat de nai sa sua po is eletzionis politigas in s’ocidenti e in Italia iat scumitiu, chena farta, in pissu de sa Lega”, at nau Ricci in televisioni. “Immoi eus a biri fintzas chi calencun’atru partidu italianu at pigau dinari, ma chi ci siat una relata manna intru de su partidu de Salvini cun cusssu de Putin ddu ant bistu totus, at aciuntu.
Reatzionis a sa nova funt lompias fintzas de Fradis d’italia: “Si narat chi sa Russia apat finantziau partidus in binti Stadus, de su 2014, cun prus de trexentus milionis de dollarus. Po mei no est unu spantu poita est una cosa chi ant sempiri fatu. Ia bolli sciri is nominis, chi ci funt, de calencunu italianu, poita po mei bolit nai a airi traigiu”, at scritu in Twitter Guidu Crosetto.
De cantu su Mateu Salvini narat sa sua: “Is solus chi ant pigau dinari in tempus passaus de sa Russia funt is comunistaas. Deu non apu mai pediu e mancu mai pigau dinari. Facant nominis e sangunaus. At pagau su Pd? Chi sa Russia apat donau dinari a su Pd si scipat. Su solu Stadu strangiu chi de candu facu politiga m’at propostu de fairi unu viagiu a contu insoru funti s Stadus Unidus. Deu non ddue soi andau. Atrus giai, liberus de ddu fairi”.
Màuru Mura
Su 14 de cabidanni de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://forbes.it/2022/04/07/russia-vuole-pagare-debiti-rubli-rifiuta-non-vedere-soldi/
