Depiat binciri s’Argentina e ddu at fatu. Batendu sa Polonia po 2-0, gratzias a una partida sempiri a s’atacu sa scuadra de Messi bincit su gironi e andat a is otavus, aunia s’at a giogai su aintru o a foras cun s’Australia. Meda prus forti sa scuadra de Scaloni, ma finas tropu pagu cosa sa Polonia, chi a s’acabu, a dogna manera, podit festai; gratzias a sa diferentzia in is gol fatus e pigaus passat a is otavus aunia at atobiai sa Francia.

Nemancu su rigori faddiu de Messi a s’acabbu de su primu tempus  – grandu meritu a Szczesny po ddu airi parau – frimmat sa cursa de s’Argentina chi, a pustis sa batosta contras s’Arabia Saudita, torrat a ponni is cosas comenti si depint e torrat finas a essiri una de is favoressias po sa vitoria finali po custus mondialis de fubalu de su Qatar 2022. S’Argentina si giogat sa partida cun sa Polonia feti po dda binciri e passai a is otavus po no erriscai nudda. Finas sa Polonia, chi partiat de cuatru puntus e de su primu postu de su gironi, non bolit erriscai nudda e cun d’unu paregiu iat segura de sa cualificatzioni.

Scaloni, s’allenadori argentinu scioberat de giogai cun su 4-3-3, lassendu a foras Lautaro Martinez po fairi giogai a innantis de su cumentzu Julian Alvarez, agiudau de is tres in palas Mac Allister, Messi e Di Maria. Giogat de su cumentzu finas Enzo Fernandez, chi iat fatu unu gol spantosu cun su Messico. In difesa torrant Molina a drestra e Romero cun Otamendi a su centru chi iant giogau sa partida contras is Arabus, a manca giogat Acuna. Ambos is gol in su segundu tempus cun duas bellas giogadas de Mac Allister e Julian Martinez. Prus de una borta is argentinus ant erriscau de fairi su de tres ma is paradas de su portiere polacu ant frimmau su disigliu.

Immoi s’Australia, e giai no at essi unu spantu chi binciat sa scuadra de Messi. Est torrada s’Argentina, e tenit totu is cartas in regula po bisai unu de is primus cuatrus postus.

 

 

Màuru Mura

 

 

Giobia, primu de Mesi de Idas de su 2022

 

 

Foto: https://www.elconfidencial.com/deportes/2022-11-30/polonia-argentina-partido-qatar-directo_3531855/