“Is curpas in chistioni funt gravis chi sussedint in Ungheria ma finas in s’orrestu de su mundu. Totu cussu chi seus fendu ddu narat sa lei”. Custu, in fueddus pagus, cussu chi narat, e benit scritu in X, su portabogi de su presidenti ungheresu Viktor Orban, Zoltan Kovacs po cantu pertocat Ilaria Salis, sa maista de arreiginis sardas impresonada in Ungheria e amostada in cadenas in Tribunali. Un’immagini chi at fatu su giru de su mundu e at spantau a totus.
“Cussu chi narat Ilaria Salis – at aciuntu sempiri Zoltan Kovacs – est de ponni in duda, comenti amostau, intru de atru, de is fueddus fartzus de issa e totu po cantu pertocat s’istrutzioni sua, sa situatzioni familiari e is relatas chi tenit. Totu dichiaratzionis chi s’indagu at amostau comenti de fartzas”.
Budapest, a dogna manera, torrat a palas is curpas de “is giornalis de manca e is socius de is diritus umanus” e negat chi Ilaria Salis in presoni non bengiat posta in cunsideru comenti de personi. “No est beru nudda. Est probabili chi is curpas chi tenit tocat a ddas castiai beni meda”, scrit galu su portabogi de Orban, chi, in segus fueddendu de s’abogau de sa picioca, Gyorgy Magyar, ddu at pintu comenti de “un’abogau comunista”.
“In is presonis de s’Ungheria, is presoneris, papant tres bias a sa dì chi po nosu est su necessariu po is bisongius de is personis”, sighit a sciolloriai Kovacs, “totus benint cumpudaus, de sighiu, po s’igiene e po is abbisongius medicus. Est fartzu ca in is cellas ddue funt is sorigus e aciungiu finas chi is presonis ungheresus funt unu spantu po pulitzia”
“Est finas de nai – acabbat sempiri Kovacs – ca de nosu is presoneris chi creint de non tenni diritus podint presentai denuncia a is autoridadis”.
Atra genti est chistionendu de s’Italia, ma in donnia a fueddus macus tocat a tenni origas surdas. Ddu naraiant finas is becius. E si sciti ca is becius funt sempiri sabius.
Màuru Mura
Mercuris, su trintunu de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.tgcom24.mediaset.it/mondo/ilaria-salis-chi-e-l-italiana-in-catene-che-rischia-24-anni-di-carcere-a-budapest_76742088-202402k.shtml
