A innantis sa bisita de Pàulu Azzi e Grabieli Zappa a is discientis de su Liceu “Euclide”, in Su Planu, a pustis s’allenamentu in su Crai Sport Center. Po su Casteddu est cumentzau su caminu po sa partida de lunis chi benit, a is noi oras mancu unu cuartu, in sa Domus Arena contras de su Sassuolo.

Novas bonas po Claudiu Ranieri, chi at torrau a agatai in sa truma, finas chi po immoi feti in parti, su giogadori de mesu campu Alisandru Di Pardo. E, aici, abarrat a trabagliai po contu su feti su difensori Eliu Capradossi. Oi allenamentu nou a mengianu cun s’allenadori casteddaiu chi at trabagliaiu po agatai su giogadori chi at a pigai su postu de su scualificau Makoumbou, chi finas a immoi est su solu giogadori de su Casteddu chi at sempiri giogau de su cumentzu in is catodixi partidas giogadas finas a oi.

Duncas, eriseru a mengianu, Azzi cun Zappa ant atobiau is discientis de su liceu Euclide, un’atobiu intregau a su importu chi tenit su sport. E su fubalu at tentu un’importu mannu in sa vida de is dus giogadoris. “Soi lompiu de su Brasile in Italia chi tenia dixianoi annus, sa dì de unu m’intendia foras de logu”, at contau Pàulu Azzi. “In segus apu pensau ca mi depia ponni in caminu, tenia un’obietivu: su mengiau a pustis su lompimentu fui giai in campu prontu po custa sfida”. Finas Zappa at contau s’esperientzia sua: “Soi bessiu foras de domu candu fui ancora giovunu meda po cicai de donai sulidu a su bisu miu. Mi soi stesiau de sa familia e de is amigus mius. No est stetiu facili po nudda, ma fut una cosa chi m’intendia de fairi. Sighei su caminu bostru – at nau a is piciocus – finas chi a su cumentzu at essi mancai tostada meda”.

A s’acabu de sa ciaciarrada, Azzi at chistionau de sa partida de luni a su noti cun su Sassuolo: “In Roma eus tentu cuscentzia ca podiaus giogai finas a s’acabbu cun d’una Latzio chi, duas dis a innantis iat bintu sa partida cun su Celtic in Champions League. Immoi lompit su Sassuolo e at essi una partida de importu, ca finas insoru si depint sarvai. E nosu scieus de depiri fairi prus puntus chi podeus de immoi finas a sa parti de unu de su campionau”.

 

 

 

Màuru Mura

 

 

Cenarba, s’otu de mesi de Idas de su 2023

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

Foto: https://www.youtube.com/watch?v=GVs5B3X0f6g