Una prassa prena de genti cussa chi eris at saludau su Regina Caeli de unu de su Paba nou Lioni XIV. Candu s’est incrarau in sa prassa totu sa genti dd’at batiu is manus. E non funt mancu in pagus ca funt lompius, in sa prassa intregada a Santu Perdu, giai in centu cincuanta mila a ddu connosciri. In sa Citadi de su Vaticanu funt erribaus de dogna parti de su mundu e intru de custus finas artistas de trumas bandisticas e de su spetaculu de sa genti ca funt prontus po su Giubileu insoru. “Dominigu bonu”, is primus fueddus de su Paba americanu. Chi, in segus, at fueddau a is giovunus: “Non timais”. Duncas at arregodau s’acabbu de sa guerra mondiali de dus, chi orruiat otant’annus a immoi: “Mai prus sa guerra”. E po s’Ucraina at nau: “Si facat totu cussu chi fait po lompiri, cantu prus coideundu, a una pagi chi addurit in su tempus. Tocat a libbertai totu is presoneris e is pipius possant torrai a is familias insoru”. E ancora po sa “striscia de Gaza”: “Acabbit inderetura su fogu, s’agiudit totu sa genti chi est in su disisperu e is ostagius torrint a domu”. Ma no est mancada nemancu una pensada a totu is mamas (eris fut sa festa insoru): “Festa bona a totus”.
Est a nai ca eris in sa Prassa de Santu Perdu funt in medas cussus de sa politzia e de is carabineris po fairi imbucai sa genti. Funt dus is cumpudus: a innantis a is “prefiltraggi” e dapoi a is “checkpoint”. Totu fatu in seguresa cun is “metal detector”.
Intru de su spantu de totus, Prevost, at traessau sa prassa passentu in mesu a sa genti chi fut a sa cracaporcedda. Po amostai sa bessida de unu de Lioni XVI, aici comenti giai sussediu po s’interru de Paba Franciscu de unu, in sa prassa de Santu Perdu e in s’orruga de sa Conciliatzioni, funt stetius aprontaus dus schermus mannus po s’abbisongiu de totu is fidelis lompius.
Màuru Mura
Lunis, su doxi de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.diocesiacireale.it/2025/05/08/papa-leone-xiv-dalla-sicilia-labbraccio-della-chiesa-al-nuovo-pontefice-parla-il-vescovo-raspanti/
