A pustis cuatru partidas perdias, una in fatu de s’atra, su Casteddu torrat de Sassuolo cun d’unu puntu chi agiudat meda sa conca e in calencunu modu finas sa classifica. Imoi is sardus funt sempiri urtimus ma tenint a su costau sa Salernitana de Colantuono chi cenarba at erribai in Casteddu. Su Spezia, chi at perdiu cun s’Atalanta, est atesu feti de cuatru puntus: tocat a gherrai po cicai de ddu giumpai. At perdiu su Genoa puru, e duncas su dominigu de is piciocus de Mazzarri est andau beni.
Certu is tres puntus iant airi agiudau meda, ma tocat a fairi is contus cun is atras scuadras: su Sassuolo est una scuadra bona chi giogat beni, e custu giai de una bona pariga de annus a imoi.
Dus a dus est acabada sa partida: a innantis at segnau Scamacca po is emilianus, in segus Keità, cun d’unu gol spantosu. In su segundu tempus dus rigoris: Berardi po su Sassuolo e su capitanu Joao Pedro po is sardus.
Walter Mazzarri est cuntentu de sa partida de su Casteddu: “Po comenti dda biu deu eus giogau beni, eus tentu prus animu de atras partidas giogadas a tesu de Casteddu. Arregodaus ca eus giogau cun d’una scuadra forti meda, ma, massimamenti candu mancaiat pagu a s’acabu de sa partida, cun d’unu pagu prus de trancuillidadi da podiaus binciri. Seus partius mali, eus erriscau paricias bortas, ma in seugus seus nosu chi eus cumandau e non fut po nudda facili. De importu mannu fut a fairi puntus, serbit po abarrai prus trancuillus. Est una scuadra de piciocus bravus e intru de insoru andant de acordiu e trabagliant po sa scuadra, est sa primu cosa chi castiu candu erribu in d’una scuadra noa”.
Su capitanu de su Casteddu, Joao Pedro, at chistionau issu puru cun is giornalistas: “In custu tempus est unu puntu de importu chi eus minesciu. Eus fatu una bella partida contras de una scuadra forti dificili de atobiai po totus. A nosu dispragit meda de comenti est cumentzau su campoinau, teniaus atras bideas e gana de fairi beni, ma chi seus a custu puntu sa curpa est sa nosta. Seus piciocus chi andant de acordiu e boleus bessiri de custa situatzioni”.
Màuru Mura
Foto: https://www.youtube.com/watch?v=Qy8ljThxe28
