Mancant prus pagu de dexi dis, po sa partida uficiali de unu de su Casteddu nou, cun Fabiu Pisacane setziu in sa panchina a ghiai. Sa prima partida at essi sabudu, su seixi de austu a is noi oras mancu unu cuartu, po sa Coppa Italia. A si dda giogai cun is piciocus de Pisacane at essi sa scuadra chi nd’at a bessiri intru de Virtus Entella e Ternana. E funt giai a disponimentu is biglietus po imbucai in s’Unipol Arena.
Ma, a innantis de sa partida de unu, is orrubius-asulus ant a giogai po duas bortas, in Santander (in sa Spagna), contras de su Racing. Est una particolaridadi poita su Casteddu at a giogai duas partidas, contras de sa matessi scuadra e in sa matessi dì: sabudu chi ‘enit, a is dexi e mesu de mengianu e a is seti de merì.
Contras de is spagnolus, Fabiu Pisacane no at a podiri fairi giogai giai a Giuanniluca Gaetano e giai a Lionardu Pavoletti. In su trabbagliu de eris, in su Crai Sport Center de Assemini, is dus giogadoris ant sighiu a s’alelnai po contu insoru e non cun s’orrestu de sa truma.Est de nai ca, Gaetano cun Pavoletti, in su mesi de maju passau, si funt fatus forrogai su genugu de manca. Gaetano est giai postu beni e at a imbucai coidendu, intru de is giogadoris a disponimentu. At cuberau, invecias, Nadir Zortea e in Santander iant a podiri giogai is nous Michael Folorunsho e Luca Mazzietelli.
In su fratempus, andat a innantis su contu intru de is comporas po su campionau de ocannu chi benir. A pustis su lompimentu, in Sardigna, de Gennau Borrelli, Michael Folorunsho, Luca Mazzitelli e de Semih Kılıçsoy, su diretori Guidu Angelozzi depit ancora preniri su paris de totu sa truma de Pisacane. Serbint, e Angelozzi est trabbabliendu po custu, unu giogadori de atacu, un’atru chi gioghit in sa parti de mesu de sa difesa e unu chi sigat sa parti de manca.
Màuru Mura
Giobia, su seti de austu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.cssdesignawards.com/sites/cagliari-calcio/45897/
