Bisitai Barumini e su sartu cosa sua est comenti de scoberriri unu mundu erricu de storia, contus e traditzionis. Giai de su cumentzu, candu nos acostiaus a custa bidda pitica, chi s’agatat in Marmilla, coru de sa Sardigna, s’aria mudat e intendeus ca su logu est speciali de averas. Si respirat antichidadi in custa bidda ca fut logu de poderi e parti centrali de unu territoriu erricu de meraviglias. E de non scaresciri, po sa positzioni chi teniat e tenit, finas logu de passagiu po lompiri in calechisiat logu.
Sa testimonia de prus importu mannu, de custu passau gloriosu chi at tentu, est foras de duda s’area archeologica Su Nuraxi. Iscoberta e bogada a pigliu, in su mentris de is annus cincuanta de su seculu passau, de s’archeolugu prus famau chi eus tentu in Sardigna: su professori Giuanni Lilliu.
S’area de su Nuraxi est organizada de unu nuragi mannu de averas, fraigadu, in tempus diversus, partenduru de su seculu cuindixi a innantis de Cristu e de unu villagiu, mannu su matessi chi si nd’est pesau in su cursu de is seculus passaus. Unu logu de ammaju, su solu chi si connoscit de custa manera. Su Nuraxi, de prus de binticinc’annus a immoi, de su 1997 est a nai, est arreconnotu de s’Unesco comenti de Prenda Mondiali de s’Umanidadi.
Una prenda, cussa de Barumini, chi s’est erricau de pagu, de un’atra meraviglia: Su nuraxi de Cresia, un’atru nuragi bessiu a campu in su mentris de is trabaglius de sa Domu Zapata, antiga residentzia de is baronis sardus-aragonesus, pesada a partiri de sa metadi de su 1500 propriu in pissu de su nuragi. Oi sa residentzia spagnola, non feti su palatzu nobiliari, ma fintzas su giardinu bellu, che su soli in d’una dì de beranu, chi s’incrarat in sa prassa de sa cresia, est sa basi de su Polo Museale Casa Zapata. Custu museu est stetiu aprontau in tres setzionis: cussa Archeologica, cussa storica-archivistica e cussa Etnografica. Sa responsabilidadi e sa valorizatzioni de custu logu dda tenint cussus de sa Fundatzioni Barumini Sistema Cultura, chi cun su Centru de Comunicatzioni e Promotzioni de su Patrimoniu Culturali, intregau a Giuanni Lilliu, proponit oi atobius, mostras de cuadrus e sculturas e tenit comenti de mira cussu de fairi connosciri Barumini e is prendas de totu su logu.
Màuru Mura
Cenarba su dus de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://musei.sardegna.beniculturali.it/musei/complesso-nuragico-su-nuraxi-di-barumini/
