Una manifestada a pagamentu po cincumila personis, aprontau de tempus. E una, chena de pagai, po chini ce dd’at a fairi a pagai su billetu, chi ancora est de aprontai, cun sonumancu bintimila spetadoris. In capas ancora de prus. Funt dus is spetaculus aprontaus in sa Fiera po su noti de Prima dì de annu. Totu at essi decidiu cenarba cun d’unu atobiu in Prefetura aunia dd’ant essi totu is protagonistas, de is aprontadoris a is capus de sa giustissia.

Sa nova est su cuncertu de Marcu Mengoni: in s’obertu, bofiu de su Cumunu de Casteddu. Feti mercuris, s’assessorau comunali a sa Cultura, at acetau su preventivu de sa F Group de Simoni Ruscica, chi s’at a depiri ocupai de sa seguresa e de s’aprontamentu de sa manifestada. Su sindigu Pàulu Truzzu, atobiendu is giornalistas, at spiegau ca su giovunu de trintacuatr’annus at tentu s’indicu de sa Live Nation, sociedadi chi sighit is interessus de Mengoni, in terra sarda. Issu s’undixi de Mesi de Idas iat presentau unu stima de contus, su de dus poita su de unu fut partu artu meda, de 688 mila eurus: si depit interessai de totu, de is bagnus chimicus a sa seguresa e finas de sa filera sanitaria.

Unu afairi bonu po una sociedadi chi Ruscica at obertu cun su babbu, diventada operativa in su mesi de orgiolas de ocannu passau, cun d’unu capitali sociali de dexi mila eurus, non donau de su totu. E chi de tempus pagu iat tentu su cumandu eretu po ponni is matas de Paschigedda in prassa in Casteddu, po prus pagu de cincuantamila eurus.

Is billetus po Mengoni s’ant a podiri, forsis, comporai giai de lunis comenti si fait de sempiri in su Box Office: chini lompit a innantis, bincit. Ancora sa filera de su cuncertu, a dogna manera, no est totu a postu poita si depit decidiri de aunia s’at a imbucai, a cali ora ant essi obertus is cancellus, chi ddu at essi calencunu chi bendit cosa de papai e bufai. Totu custu at essi decidiu in s’atobiu de cenarba.

 

 

 

Màuru Mura

 

 

Giobia, su catodixi de mesi de Idas de su 2023

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

Foto: https://viterbocitta.it/2021/01/15/marco-mengoni-chi-e-eta-altezza-peso-fidanzato-vita-privata/