Nasciu, su 22 de gennargiu de su 1952, e pasciu in Pontecorvo, in sa provincia de Frosinone, Orrobertu Quagliozzi si nd’est pesau comenti de giogadori de fubalu in is piciocus de s’Almas Roma, aunia at giogau po trexi bias segnendu finas dus gol, in sa Serie D de tandu candu teniat feti dixiot’annus. S’annu infatu is presentzias funt stetias cincu in prus e dapoi est passau a su Rovereto, in sa serie C, aunia at giogau po atras trexi bias. Feti po un’annu est abarrau in Trentinu, a innantis de torrai in s’Almas, po giogai trinta partidas e fairi cincu gol. Candu teniat bintidus annus est lompiu in Casteddu, chi tandu fut sempiri in sa Serie A.
Sa partida de unu in sa Serie A dd’at fata su 3 de friargiu de su 1974 gioghendu in sa partida perdia de su Casteddu in Napoli e in su matessi campionau Quagliozzi est calau in campu atras catodixi bias. S’annu infatu, candu fut titolari, at giogau atras 26 bortas, ma su Casteddu, in cussu annus, fut postu mali meda e ce dda iat acabbada in serie B. A dogna manera, Quagliozzi, est abarrau sempiri fideli finas in serie B e a pustis cuatr’annus est torrau a lompiri in su campionau prus famau, gioghendusì atras noranta partidas e fendu otu gol. Torrau a calai in serei B, Quagliozzi est addurau in terra sarda finas a su campionau 1984-85 e s’annu dapoi si nd’est andau in s’Ancona, in sa Serie C, aunia at fatu cincu gol in binticuatru partidas, a innantis de acabbai de giogai a fubalu. At torrau a provai s’annu in fatu, in sa “Promotzioni” regionali, cun su Santa Teresa de Gaddura, ma s’est arrendiu inderetura a is infortunius de sighiu.
Cun 297 partidas, giogadas intru de serie A e serie B, Quagliozzi est unu de is giogadoris chi at giogau cun su Casteddu e tenit finas su miniscimentu de essiri abarrau a biviri po sempiri in sa capitali de sa Sardigna.
Màuru Mura
Dominigu, su binticuatru de mesi de Idas de su 2023
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.derbyderbyderby.it/calcio-italiano/serie-a/cagliari-roberto-quagliozzi-di-francesco-lavori-tranquillo-puo-arrivate-tra-le-prime-sei-del-campionato/
