Su presidenti de sa regioni sarda Christian Solinas, sa coordinadora de Fradis d’Italia Antonedda Zedda, su coordinadori de Fortza Italia Ugo Cappellacci, cun su numuru dus de su partidu Emanueli Cera, Orrobertu Caredda de Idea Sardigna, su segretariu regionali de s’Udc Andria Biancareddu cussu de is Riformadoris Ardu Salaris, de sa Lega Dariu Giagoni e de Sardigna 20Eventi si funt atobiaus in Villa Devoto, in Casteddu, po cumentzai a chistionai de torrai a biri sa giunta regionali.

In sa mesa s’agataiant finas dus consiglieris regionalis de su Psd’Az: su caputruma Francu Mula paris a Nanni Lancioni.

Sa verifica de sa Giunta, at annuntziau Solinas, at a biri sa lugi po s’atobiu de su binti e bintunu de su mesi ch’intrat, cun totu is segretarius e coordinadoris de su centrudrestra. Ddu ant essi finas is consiglieris regionalis de is partidus de sa magiorantzia, is assessoris, is sindigus e totu is parlamentaris sardus chi, at spiegau su governadori, “sa comunidadi de centrudrestra pongiat a innantis is problemas de prus importu de immoi fintzas a s’acabbu de sa legisladura chi in Sardigna funt cussus de sa sanidadi, de s’urbanistica e de s’energia” In su fratempus, at acabbau, “giai de immoi podeus torrai a trabagliai in Consigliu, cumentzendu cun sa lei omnibus”.

A innantis de s’atobiu, su deputau nou de sa Lega Giagoni iat torrau a nai ca “nosu abarraus frimus a is eletzionis de su 2019 e sigheus a bolli is tres delegas po sa Lega. Chi su presidenti bolit torrai a mescurai is cartas, ddu facat inderetura. Naraus ca nou a is tempus longus e ca giai a sa lestresa”.

Eris a mengianu Solinas iat nau ca sa lestresa po mudai is delegas no est cosa chi depit fairi cussu ma dipendit de is partidus e de is pensamentus chi ant a fairi.

“Nosu eus fatu sciri is pensadas nostras po torrai a fairi curriri sa Giunta su 29 de arbili – at invencias nau Cappellacci, a innantis de imbucai a s’atobiu de Villa Devoto – seus allirgus de sa volontadi de su presidenti ca bolit lestresa. Nosu non teneus problemas de mudamentus ma boleus chi si facat coitendu”.

 

 

 

Màuru Mura

 

 

Cenarba, su 30 de cabidanni de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.eng.it/whats-on/newsroom/engineering-e-regione-sardegna-presentano-sus