Po su Casteddu est tempus de ponni conca a sa partida de cras cun su Cittadella e Claudiu Ranieri presentat sa cuntierra atobiendu is giornalistas. Sa scuadra depit fairi is contus cun paricias assenzas; un atra borta Di Pardo, allenamentu personalizau po Viola e Mancosu, Goldaniga s’est pasau e feti po una parti de trabagliu s’est bidu paris a sa truma Obert. Ma cussu chi arriolat de prus est ca cras no at a giogai Pavoletti: “Soi castiendu solutzionis chi nosi possant giuai – at nau s’allenadori romanu – comenti de sempiri decidu feti custu merì. Bieus comenti podeus fairi, Pavoletti est unu ciogadori de importu mannu po nosu”. Est a nai ca Pavoletti erriscat de non giogai finas atras partidas e custu podit cunvinciri sa sociedadi de comporai calencun’atru atacanti: “Bieus po cantu nd’at a tenni. Lionardu non intendit dolu, ma eus a ascurtai cussu chi nosi narat”, aciungit Ranieri.
Ranieri, in segus, at chistionau de sa scuadra de su Cittadella: “Est una scuadra chi currit, non lassat in pagi is giogadoris chi tenint sa bocia, cicat de ndi furai sa bocia etotu in sa metadi de su campu tua po cicai de fairi gol. Nosu depeus essiri bravus a fairi girai beni sa bocia e non dda perdiri”.
A pustis airi fatu tres puntus cun su Como, lastima iat essi a si frimai: “Finas poita, chi boleus lompiri primus o segundus, depeus fairi sessantaseti o sessantanoi puntus, chi bastant po ci bessiri in serie A, in custu campionau a binti scuadras. Tocat a tenni una media de 2,2 puntus a partida: in domu ci seus, foras de domu ancora no”.
In su fratempus sa Lega de B at fatu connosciri is dis e s’ora de is partidas intru de sa de seti e sa de doxi giornada. Su Casteddu at a giogai su 25 de friargiu a is duas (sa de seti) in su campu de su Venetzia. Po sa de otu, in mesu cida, sa scuadra de Ranieri si dd’at a giogai cun su Genoa, martis su primu de martzu a is otu e mesu. Sa de noi sa cuntierra at essi cun su Brescia de Cellino, dominigu 5 de martzu. Cenarba 10 de martzu, a is otu e mesu, lompit a sa Domus Arena s’Ascoli. Sa de undixi contras sa Reggina, foras de domu, sabudu 18 de martzu a is cuatru e unu cuartu. Infinis, sa de doxi, cun su Sudtirol, in domu, si giogat sabudu primu de arbilli a is duas.
Màuru Mura
Cenarba, su 20 de gennargiu de su 2023
Foto: https://www.rivistaundici.com/2021/01/12/claudio-ranieri-carriera/
