Cali est sa demografia de sa Sardigna? Comenti si movit sa genti? Cali su benidori?

Si nd’at a chistionai cras martis su 21 de lampadas in sa Fondatzioni de Sardegna in s’orruga de San Salvatore da Horta in Casteddu, in ocasioni de sa presentada de su “Rapporto 2022 sui dati dell’osservatorio regionale delle migrazioni”.

Ant a chistionai de sa cica Màuru Carta, Vania Statzu, Marcu Sideri e Franciscu Pitirra. Ester Coi (sociologa de s’Universidadi de Casteddu), Taniella Sitzia (diretora Anci Sardegna), Samueli Piddiu (segretariu de sa CGIL Sardigna), ant essi is atrus reladoris. S’urtimu fueddu at essi cussu de s’Assessora regionali de su Trabagliu Alisandra Zedda.

“Sa situatzioni sarda – at nau Màuru Carta, presisdenti de su Centro Regionale Emigrazione-Immigrazione de se Acli Sardegna (CREI -ACLI) – est peus de cussu chi at nau s’Istat; In su 2030 erriscaus giai de tenni feti unu milioni e mesu de abitantis. Finas sa duda sanitaria a su Covid est stetia, a dolumannu, negativa, e custa nova est serbida. Su numuru de sa genti chi partit est sempiri crescendu e non parit chi ci siat calencuna cosa chi possat fairi mudai; sa Sardigna non parit una regioni po is giovunus”.

Epuru a dda castiai de foras depiat essiri una regioni de allirghia manna: galania de su territoriu, mari chi non s’agatat in perun’atru logu, storia, cultura, funt custas is prendas nostras. Ma a s’imbessi agataus sa sanidadi posta mali, caminus chi faint erriri, erriconis, chi tenint su poderi, chi ndi leant su dinari in atrus logus, servitzius sciolloriaus, pagus agiudus a is giovunus chi iant a bolli cumentzai.

Iat serbiri pagu po non fairi fuiri is giovunus. Chini partit non torrat ca agatat atrus logus aunia sa vida est prus facili a dogna modu. Chini partit ddu fait sempiri cun su coru in disisperu, nemus iat a bolli lassai sa mamai nostra, ma candu non c’at dinari mancu po prangiri o po pesai una familia est sa sola cosa chi si possat fairi.

 

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.eunews.it/2018/03/27/disoccupati-italiani-emigrare-lavoro/