“Deu nau ca depeus agatai puntus po s’importu de sa classifica, poita aici is piciocus pigant unu pagu de fidi: depint abarrai trancuillus e gherrai”. Claudiu Ranieri pedit a su Casteddu unu passu a innantis e cicai de lassai is zonas bascias de sa classifica a pustis sa partida perdia, po 2-0, de eriseru a pustis prangiu in Bergamo contras de s’Atalanta de Gasperini.
“Sa diferentzia manna intru de sa Serie A e sa B est sa lestresa in is giogadas. Ci funt giogadoris chi cumprendint a innantis. Depeus ancora cumprendiri ca seus in Serie A: is movidas ddas connoscint e s’agatant, ma, a dolumannu, mancat galu custu”.
Sa classifica no est certu cussa chi s’aspetainat. Ancora mancu una partida binta e feti unu gol fatu, cussu de Luvumbo in Bologna chi iat fatu bisai po unu tempus. Ma s’allenadori romanu ddu sciat giai de prima: “Ia nau a is piciocus ca is primas partidas de sa serie A funt tostadas, in totu onestadi non m’aspetaia mancu de teni dus puntus. Depis pagai de non tenni esperientzia, ma is piciocus funt trabagliendu beni meda: depeus curriri beni e non faddiri. Mercuris m’aspetu unu Milan mannu, chi gherrat po imbucai in is scuadras chi podint binciri su campionau”. Po su contu de su rigori pediu de Luvumbo, Ranieri pedit prus precisioni in su monitor: “Sa spera est chi in su VAR dongiant prus crobba a biri is movidas suas”.
“Tocat a si torrai a pigai”. Castiendu sa partida de pusti cras cun su Milan, Ranieri tenit sa spera de tenni a dispositzioni calencunu giogadori in prus. “Oi nosi allenaus e eus a cumprendiri cussu giogadoris chi istant meglius. In cust’ora tocat a ponni in campu cussus o chindechinò umperai is cincus mudamentus in sa manera meglius”.
In pissu de sa partida de eris at aciuntu: “Sa scuadra in su primu tempus m’est parta tropu timorosa, s’Atalanta tenit giogadoris lestrus chi ti ponint in dificultadi manna. Is su segundu tempus seus andaus meglius e seus lompius cuasi a paregiai, lastima poita forsis miniesciaus calencuna cosa in prus. Ma ddu sciaus giai ca depiaus sunfriri e trabagliaus po cicai de migliorai”.
Mauru Mura
Lunis su binticincu de cabudanni de su 2023
Foto: https://www.youtube.com/watch?v=9p57u2_UBCI
