Si torrat a oberri a pustis corantadus annus unu de is misterius de s’Emilia. Unu bocidorgiu, cussu de su professori Giorgiu Montanari, diretori de cincuantun’annus de sa clinica ostetrica-ginecologica de su spidali Policlinico de Modena, bociu cun seti corpus de pistola su meri de s’otu de gennargiu de su 1981, a pustis airi acabau su trabagliu in su spidali.
Su misteriu est stetiu torrau a oberri è un’omini est iscritu comenti de incurpau: est su babbu de un’omini, tandu apena nasciu, chi iat tentu calencunu problema in s’ora de s’angiamentu. Si pensat chi s’omini incurpau boliat fairi pagai a su dotori is curpas. chi de curpas si tratat.
Postu a un’ala in su 1991 a innantis e in su 2020 un’atra borta, immoi si torrat a oberri cun su spantu: ddu at decidiu sa Procura de Modena, a pustis elementus nous chi si ndi funt pesaus. Agiudu mannu finas de is tecnologias noas chi oi s’agatant in manus is indagadoris.
Anna Ponti, sa viuda, chi oi tenit norant’annus, de su dotori no at mai smitiu de cicai sa beridadi. Is magistraus, narant ca est una pista noa. E s’iscritzioni de cust’omini in su registru de is incurpaus est unu doveri po cicai sa beridadi. A issu sa Scuadra Mobili de Modena est lompia a pustis airi cumpudau meglius is cartellas medicas de su tempus. Ant torrau a pigai in manus is paperis chi iant giai cumpudau corant’annus a immoi e ant torrau a agatai prus de unu professionista sanitariu e ant aici obertu a sa pensada de una vendeta.
Invecias, in su 1981, sa magistradura modenesa si fut postu in conca de cicai su “killer” in su ambienti de trabagliu. Fut de pagu tempus imbucada sa lei de s’Abortu e su professori iat lassau libertadi de cuscentzia a is collaboradoris. Una decisioni chi non fut pragia meda a s’orrestu de su Policlinicu. Montanari iat erriciu amelessus e unu collega, chi no andaiat de acordiu cun issu, fut acabau in s’indagu de sa magistradura. Ma, finas a oi, non s’est scobertu nudda.
Màuru Mura
Cenarba, su 15 de cabudanni de su 2023
Foto: https://www.ansa.it/emiliaromagna/notizie/2023/09/14/medico-ucciso-dopo-42-anni-ombre-sul-papa-di-un-paziente_b650d6ca-4ceb-433f-bcbb-4316e26223d1.html
