Po su Casteddu seti puntus, in pissu de is noi a disponimentu, in is urtimas tres partidas: est a nai tres cun su Parma, unu cun sa Juventus e atrus tres in sa partida de eriseru a mericeddu cun su Torinu. Totu lompius a pustis aiti tocau su fundu in sa partida perdia cun s’Empoli po 0-2 in sa Unipol Domus. “Ant essi ancora medas is esaminis de giumpai, ma soi allirgu meda: fut de meda chi no ndi boddiaus is puntus chi minesciaus, invecias immoi est sussedendu”, custus is prumus fueddus de Davidi Nicola, s’allenadori de su Casteddu, a s’acabbu de sa partida.
“Sa scuadra m’at spantau po comenti s’est posta in campu e po comenti at giogau cun sa bocia, contras de una scuadra chi, no est de scaresciri, at fatu dus gol giai a s’Inter e finas a su Milan. Seus stetius bravus, in prus de su Torinu, a cumprendiri de depiri mudai sa manera de giogai candu non teniaus sa bocia”.
Nicola eris at fatu giogai cuasi is matessis giogadoris chi in s’urtima partida iant paregiau contras de sa Juventus, cun su solu Luvumbo invecias de Obert. “Eus possiu trabbagliai cun sa parti manna de sa scuadra chi at giogau custu merì in is urtimas duas cidas”, sighit a nai Davidi Nicola. “Mina e Luvumbo funt stetius foras po doxi dis, non fut facili a giogai intru de candu su campionau s’est frimau po fairi giogai is natzionalis, ma depiaus fraigai sa partida. In sa prima parti de partida Luvumbo non cumprendiat beni aunia depiat giogai, ma iat donau meda cun sa natzionali sua e eus decidiu de ddu cambiai cun Marin, finas cussu stracu ca iat giofau duas partidas cun sa Romania”.
Nicola, a s’acabbu, donat miniscimentu a nd’airi bortulai sa partida inchi at donau custus tres puntus a su Casteddu: “Fut dificili meda binciri po sa calidadi manna de su Torinu. Ma custu campionau est pragendumì: ci funt scuadras medas chi biogant po binciri e po nosu chi, est de arregodai sempiri, nosi depeus sarvai, est de importu chi non depeus mai abasciai s’atentzioni”.
Màuru Mura
Lunis, su bintunu de mesi de talamini de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=6pENLNp0fg0
