Italia, Regno Unito cun s’Egito funt testimongius de unu contu chi a is ogus de medas est de non creiri. Totu partit de Renato Labò: classe 1920, originariu de Sarmato, in sa provincia de Piacenza. Iat cumbatiu in El Aalamein aunia is ingresus ddu iat fatu presoneri de Guerra.

Postu in d’unu campu de presoneris, aici at contau su giornali “Libertà”, a pustis s’armistitziu ddu ant fatu cumentzai a trabagliai in d’una fatoria in Horsington, in su Somerset. Innnoi nascit s’amori po sa figlia de is meris e de custu amori benit a foras Gin, ma Renato candu sa pipia nascit fut giai torrau in Italia poita sa guerra in s’Italia fut giai acabbada. In Italia at postu familia; un’atra pipia benia a su mundu: Eugenia.

Candu Gin est diventada mama, sa figlia Glare, at decidiu de fairi de totu po agataia su nannai  e totu s’areu. Sa cica est stetia dificili meda et est durada annus, poita si teniant novas pagus de totu custu contu. Torrendu gratzias a s’agiudu de is archivius de sa Croce Rosse Internatzionali Clare est arrennescia a intrai a sciri is nominis de is presoneris de su campu 47 de Motcombe po sciri ca feti in dus si lamaiant Renato: unu nasciu e pasciu in su Varesotu e unu de Agazzino de Sarmato, in provincia de Piacenza.

De tandu totu est diventau prus facili meda, gratzias a Facebook: at cuntatau sa pagina de is abitantis de sa bidda e totus dd’ant mandada de Eugenia Labò chi indenanti de sa sola fotografia in vida de su babbu ddu at inderetura arreconnotu. Gin cun Eugenia si depiant giai connosciri dus annus a immoi ma sa pesta at frimmau totu. Immoi, e giai fut ora eus a nai si funt torradas a agatai e ant passau paris una cida in su Piacentinu, cun d’una grandu festa aprontadanda in d’una tratoria de su sindigu de Calendasco Filipu Zangrandi.

Sa impromissa est ca immoi at essi Eugenia a rendiri bisita a Gin.

 

 

6 de làmpadas de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto:  Eugenia e Gin (foto concessa dal quotidiano “Libertà” via Ansa)