Una die intregada a sa poesia in ammentu de Tiu Antoni Cuccu, “s’imprenteri bagamundu” chi po annos e annos at isparghindau cultura in totu sas biddas de Saldigna bendende sos libros cun sos versos iscritos e a bolu de sos mannos de sa poesia sarda. Ocannu puru, sa Comuna de Santu Idu, at aparitzadu un’abboju pro ammentare su fizu sou istimadu. Pro s’ocasione s’est fata una gara de poesia cun Giuseppe Porcu, Bruno Agus e Diegu Porcu acumpanzados dae su tenore de Santu Lussurzu. Prima de sa gara sas relatas de Danilo Melis (consizeri comunale chi s’est leadu s’impignu de ammentare a primore a Tiu Antoni), Lussorio Cambiganu (amantiosu de poesia sarda chi po primu in su 2021 at tentu s’idea de organizare una die in onore de tiu Cuccu), Anna Cristina Serra (poetessa) e Pier Sandro Pillonca (giornalista). In s’esòrdiu sos poetas an ammentadu a tiu Antoni e an faeddadu finas de sa netzessidade de dare amparu a sa limba sarda e a sos valores chi issa costoit. Custa est sa trascritzione de s’esòrdiu e de sos sonetos cantados in Santu Idu su 23 de Cabudanni.
ESORDIU
1. G. PORCU
De sardos versos in cantu e misura
mai t’aia ‘atidu in sinu tou
o Santu Idu, e digna como addura
prite ses onorende a fizu tou
chi cun su fagher mannu e forte sou
l’at mantesa custa nostra cultura
de bàntidu cantende lu carigno
e su primu saludu ti cunsigno
2. AGUS
Si che soe torradu dae nou
gràtzias meda, o cara Santu Idu
e ispero puru ‘e fagher bellu prou
a da chi ‘e nou mi as preferidu
Ammentende unu caru fizu tou
naschidu inoghe e inoghe creschidu
pro tiu Antoni un’amigu connotu
deo bos torro a saludare a totu
3. D. PORCU
Mai fit capitadu o Santu Idu
a ch’enner de poeta ‘estidu in pannos
ca in su cursu ‘e custos pagos annos
mi faghes oe su primu cumbidu
e l’as fatu sintzeru sena ingannos
gai matessi l’apo aggradessidu
pro custu tou fizu unicu e raru
ti nd’apo ‘atidu unu saludu caru
4. G. PORCU
Amiga zente intro su coro inserra
de tiu Antoni totu su valore
dae issu fachemus una gherra
a sa cultura pro li dare onore
cussa ch’est fiza de sa nostra terra
prite meritat de tenner onore
e la devimus crèschere e sustènnere
pro la dare a su tempus chi at a bènnere
5. AGUS
Cun zente ‘e Santu Idu e zente istranza
m’ammento ‘e tiu Antoni sa figura
cando cun sa pandedda pro cumpanza
moviat de inoghe a s’aventura
colchende puru a s’arranza-arranza
at semenadu limba cun cultura
su ch’at fatu in sas terras saldignolas
non l’ana fatu mancu sas iscolas
6. D. PORCU
Pro lu antare non bi nd’at faeddu
non bastan sas otavas de notesta
l’apo connotu da sende piseddu
a da chi giraia calchi festa
a boltas fit de umore nieddu
a segundu de calchi richiesta
Ma però fit omìne de cussèntzia
m’a bortas pagu nd’aiat passèntzia
7. G. PORCU
O Santu Idu in su coro costois
a fizu tou e s’ammentu li giughe
ma sa cultura nostra gridat: ohis!
proite est donzi die posta in rughe
pro cantu custu lu namus tra nois
paga cosa nde bogamus a lughe
nende su giustu a dare dignidade
politica bi cheret e voluntade
8. AGUS
Deo l’apo tentu meda afetzione
e cantu mancat mi nd’abbizo como
sas avertèntzias mancu bos fentomo
chi mi at dadu in calchi ocasione
a sa limba de sa traditzione
che l’at fata intrare in dogni domo
ca sas cantones e garas trascritas
mi parian gràscias beneitas
9. D. PORCU
E deo puru da chi l’apo idu
li apo tentu sempre afetzione
in tantos logos ja l’apo sighidu
l’iscultaia cun devotzione
su primu libru chi apo legidu
fudi s’istoria de Bachis Falcone
chi sempre ja lu tenzo in sa memòria
totu in mente l’aia cuss’istòria
10. G. PORCU
Ma in altu deven fagher sos tantos
in su Guvernu a dare sos cunfoltos
ca Pisistrato sos omericos cantos
cun rejone los aiat regoltos
in s’olvidu pro non essere moltos
e gai los lezimos totucantos
custu de meda l’an fatu in Atene
ma sos sardos non lu faghimus bene
11. AGUS
In Atene fin mastros de cultura
ma issu l’at sighida cust’istrada.
Sa carriera l’apo comintzada
bidende a issu sempre de figura
mi naraiat: “Brunu, sa natura
ammentati chi cheret aggiuada.
Da chi leadu t’as custu caminu
isfòglia libros e leze continu”
12. D. PORCU
In dogni logu at lassadu sos sinnos
e chi mai los ponzan in ritiru
de poesia dende sos atzinnos
ca fit apassionadu de ammiru
ma a bortas proaian sos pitzinnos
in carchi logu a lu leare in giru
pois però da chi lu connoschian
finas sos libros li comporaian
13. G. PORCU
Lassa de sos piseddos su tintinnu
prite de bonu fagher fit pienu
deo s’ammento bos canto serenu
su ch’in su coro m’at lassadu sinnu
ca comporadu ja l’apo a pitzinnu
su libru bellu ‘e Mertzioro Murenu
prima m’at fatu ‘ider cuss’iscritu
e dendemìlu mi l’at beneitu
14. AGUS
Issu leadu at cuss’impiegu
sempre a giru ‘e comunu in comunu
però non diat cherrer chi un’arrennegu
mi lee pro calchi faeddu importunu
proite a tiu Antoni, o Diegu
non l’at leadu in giru nisciunu
ca l’an tentu afetu cun rispetos
de sa Saldigna in totu sos tretos
15. D. PORCU
O Bruno, isculta cun tonos adatos
deo non l’apo nadu in modu duru
issu fit omine de donos cumpatos
lu sento deo puru cuss’iscuru
ses bistadu pitzinnu tue puru
tando l’ischis comente sunu fatos
non cumprendian su valore sou
e a bortas faghian cussu prou
16. G. PORCU
Diegu in su ch’est seriu como addura
teniat a s’arte nostra riguardu
in s’istudiu li tenzan pius cura
prima su tempus chi che siat tardu
s’Assessoradu, a bortas, de cultura
in Regione mancu faeddat sardu
Ite cultura tando est chi difendet
cando sa limba sua non cumprendet
17. AGUS
Como as tocadu unu tastu feu
Giuseppe su ch’as nadu est seguru
ma torrende a tiu Antoni po recreu
gai esserat abbarradu in su futuru
ca fit finas amigu ‘e babbu meu
poi diventadu amigu meu puru
l’apo tratadu sempere cun grabbu
che chi mi esserat etotu unu babbu
18. D. PORCU
Dognunu a tiu Antoni fit devotu
fit un’eroe pro sa poesia
Brunu, non fit amigu tou ebbia
ca l’ischimus chi fit amigu ‘e totu
e sa Sardigna in sa terra nadia
l’an in totue istimadu e connotu
su numen non si ch’andat cun su ‘entu
paret ch’adduret che unu monumentu
19. G. PORCU
Ma pro sa nostra sarda natzione
creschire nde devimus ideales.
libertade, dignidade, rejone
mentre d’italianu sos giornales
faeddan gai retes e canales
e in sardu non b’ada unu cartone
a fizu tou das in sardu afilu
e poi lu guastan in s’asilu
20. AGUS
Chie non tenet a sa limba istima
tenet a custa terra paga afetzione
deo non penso a s’istrutzione
ca cussa paret ch’est pius in chima
ma Pier Sandro lu fit nende prima:
pro sa limba bi cheret unione.
E-i sos sardos sunu connoschidos
pro essere istados semper pagu unidos
21. D. PORCU
Ma carchi cosa cheriat decisa
prite su fatu est tropu importante
prima su tempus chi andet distante
carchi lege bi cheret improvisa
e sos chi cheren sa limba divisa
cussos, o Bruno, sun zente ignorante
non bi at Logudoro o Campidanu
sa limba est una in su logu isolanu
22. G. PORCU
Magnifichen sa limba cun s’istòria
s’italianu puru est importante
ca certos cantos de s’Inferru ‘e Dante
los ammiro e los ripito a mimòria
ma non creo s’anzenu unu zigante
e deo pistercheddu ‘e paga glòria
Ajoni! Una cultura est ch’amus rara
e miremus su restu cara a cara
23. AGUS
Nois tenimus una terra ‘e fama
però tenimus pagu sentimentu
e si non cambiamus su programa
pro sa limba est unu fallimentu
però de issa su primu aprendimentu
si suet in sa tita de sa mama
e-i sos fizos pagu nobilitan
sas mamas chi ‘e sa limba los istitan
24. D. PORCU
Ca totu est incue sa puntiglia
e incue lu chirches su decoro
in dogni domo bi cheret sa briglia
chi su sardu lu tenzan in su coro
ca sos pitzinnos in dogni famiglia
lu deven faeddare in domo insoro
però ateras limbas lis intregan
e-i sa limba insoro la rinnegan
25. G. PORCU
Sa fama mala cando ‘enit meréschida
s’illusione vana est ingannia
però noa bi cheret un’avrèschida
de cussièntzia e de sabidoria
ca devet essere sa limba in sa crèschida
sa limba nostra intro s’economia
imbetzes annos fatu amus s’errore
chi girada che l’amus a folclore
26. AGUS
Ma tue a folclore non la giras
ca cheres pro sa limba fama e glòria
nois tenimos millenaria un’istòria
e tue puru, o Giuseppe, l’ammiras
ma su soneto de Remundu Piras
lu devian totus ischire a memòria
e deviat esser cussa prenda manna
picadu ‘e sas iscolas in sa janna
27. D. PORCU
De l’imparare che una dutrina
totu devian tenner s’oriolu
però su male est in sa raighina
e non si tratat de sa limba solu
ca dogn’usàntzia antiga e divina
sunu a dies de oe in disconsolu
e de sa limba solo non si tratat
totu in dificultade si agatat
28. G. PORCU
A nos giogare totu cale pena
difendemas sa nostra identidade
ma credèndebbi cun abbilidade
de bilgonza seghende sa cadena
e poi umana sa sotziedade
est ligada comente una carena
cando su coro tenes suferente
nemmancu bene t’intendes in mente
29 .AGUS
Deo non naro prite non l’acabbas
ca cussa est sa mezus melodia
Giuseppe nois sighimos custa via
però su mundu est pienu ‘e Barabbas
nos nde sunu furende s’energia
como apaltende sun puru sas abbas
tantu nois no nde faghimos briga
ca ja nos an domadu a dogni origa
30. D. PORCU
A dogni cosa an postu su juale
comente cheren issos an trubadu
cumandados in totu in generale
no san in dogni cosa assugetadu
e a da chi iscopiat calchi male
subitu a inoghe ‘enit dirotadu
paret chi siat custu sardu logu
pro dogni male a li ponner s’isfogu
31. G. PORCU
Ma non solu sa limba est guastada
donzi tribàgliu ponidemi mente
como sa befa noa capitada
chi fit donzi polcalzu suferente
nachi sa pesta che fit debbellada
e nos la torran dae Continente
e nois ubbidinde a sos padronos
ca, pagu bene, non bi semus bonos
32. AGUS
Cussa est una bella epidemia
e dogni cosa nos sighit a ofèndere
ischimos no est in Saldigna ebbia
custu sa zente ja l’at a cumprèndere
ma un’allevamentu infetu de Pavia
però sos porcos at sighidu a bèndere
Però cando inoghe l’an connotu
in Saldigna ana blocadu totu
33. D. PORCU
O siat in Pavia o aterue
semper a nois ponen in ruina
ca movet da inoghe dogni nue
da ch’est infeta calchi raighina
siat de porcos o roba erveghina
totu nd’imbolan sempre da totue
e poi tocat cun ahis e ohis
dogni male a lu pagare a nois
34. G. PORCU
Su giambare timimus che bobboi
e sa disunidade in avolotu
nos ponet in s’unire sena motu
e la finimus brighende chin ohi
sos ch’an firmadu a Giommaria Angioi
tantu sardos ja fini gai etotu
isperende in-d-un’era digna e noa
de s’esòrdiu la serramus sa proa
35. AGUS
Si la finimos no est a pagu incuru
su ch’amos nadu ponet pena e dolu
però bi cheret allegria puru
improvisende sos versos a bolu
sa pandemia si ‘ochit porcos solu
a mie non mi spantat de seguru
non mi ponzo pro cussu in pensamentos
ma bois duos istadebbi atentos
36. D. PORCU
A nois, Bruno, non at a tocare
ca tocat a su corpu a s’animale
però si azis nadu a la serrare
deo che bois la serro uguale
naran chi passat semper dogni male
e custa puru ja ch’at a passare
gai lu naran e gai lu crene
e isperemus chi si finat bene
SONETOS
Giuseppe Porcu
Paret sa Panda ch’in s’istatzione
bido ancora, e cun boghe bilgonzosa
deo pedinde sa cantone ‘e Bosa
de Nùgoro pitzinnu in s’istradone
m’ammento betza sa manu nodosa
de libritos chilchende in su muntone.
Poi lestru m’at nadu calchi cosa
tipu verbos de beneditzione
Mi ch’ando cun su libru ‘e Merchioro
ma tiu Antoni de cussos mezores
nd’at semenadu sos versos de oro
e gai etotu pro sos cantadores
immortalende sos versos insoro
pro los dare a sos tempos bennidores
si no bolende lebios che su ‘entu
in su mistèriu si che fin andados
solu de pagos restende in s’ammentu
Cun cussièntzia imbetzes imprentados
sunu valore d’una natzione
lezìdos, recitados e cantados.
Ma paret tempus in s’istrutzione
b’intren istòria e cultura in Saldigna
pro fagher una generatzione
lìbera, rispetada, forte e digna
segura, cussiente, orgogliosa
de custa terra pro crescher s’insigna.
O Santu Idu, mama afetuosa
ammenta a fizu tou ch’at lassadu
una sienda manna e valorosa
Deo pedo chi sia perdonadu
a tiu Antoni como ammento ancora
saludo a totu e andade in bonora.
Bruno Agus
Santu Idu cun istima segura
a tiu Antoni li as resu onore
e gai as ammentadu sa figura
de un’omìne ‘e profundu valore
chi de sa limba sarda e sa cultura
est istadu unu mannu ispalghidore
finas essende in s’edade madura
pro cantu at tentu fortzas e vigore.
Fit un’òmine ‘e nòbiles cuncetos
e non s’est sa Saldigna ismentigada
cun sa machina carriga ‘e libretos
de sa poesia iscrita e improvisada
at ‘alanzadu istimas e afetos
de un’ùmile ambulante ‘e istrada
però poi de sa sorte sas tramas
an frimmadu sa sua passione.
Como sighire sos suos programas
devian sos mastros de s’istrutzione
ma sos chi sun in sa sarda Regione
paren chi non las tenzan cussas bramas.
Ma tue Santu Idu orgogliosa
nde sias, ca l’as dadu sa nadia
e ses istada una mama amorosa
e deo ca non poto àtera cosa
cun cust’ùmile vena ‘e poesia
ti lasso s’adiosu ‘e parte mia.
Diegu Porcu
O Santu Idu ses poninde cura
a dare a tiu Antoni sos onores
chi l’aiat in coro pro natura
a dare pesu a sos sardos valores
e at salvadu cun s’imprentadura
sas menzus garas de sos cantadores
e sos chi amus amore a sa cultura
ancora nde gustamus sos sabores.
A s’anda e torra in-d-una machinedda
tucait dae inoghe a dogni logu
girende dogni punta e dogni sedda.
Ma pro issu fit unu disaogu
su chi a nois paret sacrificu
issu l’aiat comente unu giogu.
Non fit s’iscopu ‘e diventare ricu
ca fortzis mancu su tantu ‘e s’ispesa
nde torraiat dae cuss’aficu
E at vivìdu sempre in umilesa
prite s’unicu sou pensamentu
fit a dare a sas garas sa salvesa.
Dae minore istima l’apo tentu
e a da chi non l’apo pius bidu
ancora intendo cussu mancamentu.
Como bi penses tue Santu Idu
a dare lustru a sa sua memòria
ca issu pagu ja si nd’est godidu
iscritu at una pàgina ‘e istòria
òmine onestu e de coro bonu
so siguru chi ch’est in s’alta glòria
cun sos poetas totu in arrejonu.
Deo fininde custu cantu umìle
po calchi errore bos pedo perdonu
e adiu caru pòpulu gentile
