S’atobiu est po sabudu su 26 de custu mesi, a is cincu e mesu de merì, in su logu de su Polo culturali de orruga Antoni Gramsci in Armungia, candu at essi inaugurada sa Biblioteca comunali intregada a Emiliu Lussu, scritori, politigu e antifascista armugesu, intru de is prus mannus intelletualis sardus de su Noixentus.
Sa pensada est stetia portada a innantis, in manera forti, de s’Aministratzioni domunali e aspetada de sa genti de sa idda pitichededda de su Gerrei. A pustis is saludus de su sindigu Antoni Quartu at a sighiri sa presentada de is tres librus in pissu de is Atus de is cunvegnus Internatzionalis de Studius in pissu de Emiliu Lussu, aprontaus in su a intru de su Festival Premio Emilio Lussu in is annus chi funt andaus de su 2018 a su 2022. Is librus ant amostau studiosus lompius de universidadis italianas e europeas e funt stetius publicaus de su sotziu culturali L’Alambicco. Giai de sa s’editzioni de unu is atobius ant poderau unu caminu in prus disciplinas, andendu de sa storia a sa literadura e de sa politiga a s’arti. Custus studius ant cuberau novidadis medas e atras connoscentzias po mori de atrus paperis chi non si connosciant agataus in is archivius europeus. E ndi funt bessias a pigliu pensadas noas de s’opera lussiana.
Sa dì de sa presentadas, in prus de su sindigu, si ddue ant agatai finas Giuanni Jagu Ortu, presidenti de su Comitau Scientificu internatzionali de su Festival Lussu e faidori de dus librus de is Atus, Arbertu Cabboi e Christian Rossi faidoris, in is annus passaus, de librus intregaus a Lussu, e Alissandru Macis, diretori artisticu e presidenti de su Sotziu L’Alambicco.
Intru de sa manifestada at essi arregalada a sa Biblioteca una copia perunu de totu is librus chi funt lompius a su Premio Lussu po is setzionis de contus, sagistica e contus de pintadas.
Màuru Mura
Mercuris, su bintitres de mesi de talamini de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.shmag.it/sardegna/31_07_2023/lo-studio-originale-restaurato-di-emilio-lussu-si-apre-al-pubblico-nel-cuore-di-armungia/
