Torrada eletorali in Campania, Puglias e Venetu: acabbat 2-1 po su centrumanca, aici comenti si sciat. In Campania su candidau de su “Campo Largo” Orrobertu Fico bessit a prus de su 60% contras de su candidau de su centrudresta Edmundu Cirielli. Una distantzia manna chi fait allirgai totu su centrumanca, ma prus de totu is Steddaus chi in is social at postu una imagini de Fico cun Alissandra Todde e su messagiu: “Orgogliu mannu cun is nostrus dus Presidentis”.
“Sardigna e immoi Campania: po is steddaus est storia: dus governadoris de Regionis in dus annus, candu a innantis non ddi teniaus manc’unu. Custu nosi donat prus fortza e coragiu: eus a gherrai cun is ungas e cun is dentis po mudai is cosas de s’Italia nosta”, is fueddus in is social de su “leader” de is Steddaus Giusepu Conte, chi at finas arregodau is sartidus de sa Meloni cun Tajani: “Immoi non sartant prus”.
Finas in Puglia su candidau de su centrumanca, Antoni Decaro, at tentu, giai de su cumentzu numurus prus artus meda de su candidau de su centrudresta Luisu Lobuono. Decaro est lompiu a su 64% contras de su 35% de Lobuono, chi at nau: “Pigu cuscientzia de su sceberu de sa genti pugliesa, facu is augurius a s’onorevoli Antoni Decaro chi at essi su presidenti de sa Regioni Puglia. Dd’apu lamau a su telefunu po m’allirgai cun issu”.
In su Venetu atru arresurtau che is matessis de is atras duas regionis, ma a s’imbessi: difatis su candidau de su centrudresta Arbertu Stefani, cun su 64% bincit contras de su candidau de su centrumanca Giuanni Manildo chi si frimat a su 30%
“Gratzias de coru, venetus! Cun emotzioni manna apu erriciu s’onori de bosi rapresentai””, is primus fueddus de Stefani, governadori nou de su Venetu a pustis su “regnu” de Zaia. “Intendu a intru de mei – at aciuntu Stefani – una responsabilidadi manna e un’energia ateretanti. Bogliu chi siat craru a totus: apa a ponniri is abbisongius de sa genti a innantis de totu e ap’essi su presidenti finas de chini non m’at votau”.
Màuru Mura
