A cumentzai de su binti de custu mesi, in Australia e in sa Noa Zelanda s’ant a giogia is mondialis de fubalu po is feminas. E, s’allenadora de sa Natzionali italiana Milena Bertolini at fatu connosciri sa lista de is binticincu piciocas chi ant a partiri po s’Oceania po aprontai is allenamentus po sa prima partida, in su Eden Park de Auckland contras de s’Argentina. Est su gironi G cussu de sa Natzionali asula e in prus de s’Argentina e de s’Italia si ddue agatant finas sa Svetzia e su Sudafrica. Sa partida de unu de is italianas at essi su binticuatru.
In prus de Sara Gama, chi est stetia una de is steddas prus lucentis de is annus passaus, ma immoi est becigedda, Bertolini at lassau in domu Katja Schroffenegger, Valentina Bergamaschi, Julie Piga, Chiara Robustellini, Eva Schatzer, Flaminia Simonetti e Martina Piemonte. Cussa de Sara Gama at fatu morrungiai calencunu, ma sa Bertolini non s’est fata cunvinciri po nudda: “S’arti mia est cussa de scioberai. E cussu apu fatu”.
Custas funt is giogadoras chi ant a provai a portai in Italia sa copa de su mundu:
Portieris: Rachele Baldi de sa Fiorentina, Francisca Durante de s’Inter et Laura Giuliani de su Milan;
Difensoris: Elisa Bartoli de sa Roma, Lisa Boattin de sa Juventus, Lughia Di Guglielmo de sa Roma, Maria Luisa Filangeri de su Sassuolo, Martina Lenzini de sa Juventus, Elena Linari de sa Roma, Biatrice Merlo de s’Inter, Benedeta Orsi de su Sassuolo e Sessilia Salvai de sa Juventus;
De mesu campu: Arianna Caruso de sa Juventus, Bolentina Cernoia de sa Juventus, Giulia Dragoni de su Barcellona, Manuela Giugliano de sa Roma, Giada Greggi de sa Roma e Emma Severini de sa Fiorentina;
Atacantis: Crara Beccari de sa Juventus, Brabara Bonansea de sa Juventus, Sofia Cantore de sa Juventus, Bolentina Giacinti de sa Roma, Cristiana Girelli de sa Juventus, Benedeta Glionna de sa Roma e Annamaria Serturini de sa Roma.
Màuru Mura
Martis, su cuatru de triulas de su 2023
Foto: https://www.donnapop.it/2022/07/10/italia-femminile-calcio-giocatrici-convocate-europei/
