“Elly, podis finas decidiri de non benni, ma non c’es perunu abisongiu de ofendiri totu cussus chi ant decidiu, invecias, de partecipai feti poita ant tentu su coragiu chi forsis a bosatrus mancat”.
Sa presidenti de su Consigliu e “leader” de is Fradis de s’Italia, Giorgia Meloni, serrat Atreju, sa festa de su partidu, chistionendu a sa segretaria de su Partidu democratigu Elly Schlein. Chi no at acetau su cumbidu de partecipai a sa festa. “Deu de democratiga – at nau sa Schlein – ap’essi sembiri oberta a sa relata, in su miniscimentu, cun totus. Finas e massimamenti cun sa presidenti de su Consigliu Giorgia Meloni. A dogna manera, cussu chi no apu agradessiu non est stetiu unu cunfrontu po is chistonis, ma est stetiu unu cumbidu a sa festa sua de partidu in sa dì in sa cali in Parlamentu nos ant proibbiu in pissu de su salriu chi pertocat tres milionis e mesu de trabagliadoras e trabagliadoris. Iant a benni inigui a fairi su confrontu candu ddu pedeus. Ia bolli nai cun craresa chi, po sa cultura politiga mia, non iari possiu mai ponni peis in pissu de unu palcu aunia ddue fut unu comenti de Abascal chi at nau ca Pedro Sanchez iat essi depiu essiri apicau a conca in giossu. Deu cun is nostalgicus de su franchismu e de su fascismu su palcu non ddu cumpartzu”.
Bandelas cun is coloris de s’Italia ant erriciu su lompimentu de sa Presidenti de su Consigliu in su palcu. “Chi de trint’annus, cun formulas diversas, su centrudrestra s’agatat galu no est un’incidenti de sa storia – at aboginau –. S’agatatat de trint’annus poita cumpartzeus una filera de valoris e una pensada cumuna de ponni in campu. Torru gratzias mannas po custu a chini no est prus in custu mundu, gratzias Sirviu Berlusconi”.
“Su guvernu de centrudrestra a cumandu de Fradis de s’Italia – at aciuntu – at essi massimamenti custu guvernu de s’Italia cun sa schina ereta, chi andat a conca arta, cun is crapitas prena de ludu e is manus limpias”.
Màuru Mura
Martis, su dixiannoi de mesi de Idas de su 2023
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.unita.it/2023/12/17/atreju-cose-festa-fdi-meloni-polemiche-musk-abascal-orsini-spalletti/
