Atra partida perdia po su Casteddu, e imoi funt tres de cincu giogadas. A sa Unipol Domus s’Empoli si pigat is tres puntus, torrendu gratzias a is gol de Di Francesco, in su primu tempus e de Stulac in su segundu. Acabat 0-2 po is toscanus.
Po sa segunda partida in sa panchina sarda s’allenadori Walter Mazzarri fait cumentzai custus ominis: Cragno, Walukiewicz, Ceppitelli, Carboni, Lykogiannis, Nandez, Deiola, Marin, Dalbert, Joao Pedro e Keita.
Arrespundit Andreazzoli, invecias cun Vicario, Stojanovic, Romagnoli, Viti, Marchizza, Zurkowski, Ricci, Henderson, Haas, Di Francesco e Pinamonti.
Sa partida cumentzat inderetura cun gana e cursa. Ci provat s’Empoli cun Marchizza e arrespundint is sardus cun Joao Pedro, chena intzertai sa janna.
A pustis binti minutus su Casteddu cicat de fairi calencuna cosa de prus, cun Keita, Nandez e Lykogiannis. Ma est s’Empoli a “erriscai” de prus a fairi gol, candu Marchizza ponit in area una bocia chi Di Francesco non di boddit po unu sulidu de bentu. Gioghendu ca ti giogu is toscanus segnant de averas e ddu faint sempiri cun Di Francesco (figliu de s’allenadori beciu de su Casteddu) a su minutu bintinoi.
Su Casteddu non si ndi scidat mancu tandu e, antzis, est ancora s’Empoli chi s’acostiat de prus a sa janna de Cragno. Su primu tempus acabat cun sa scuadra de Andreazzoli in pissu e su Casteddu a suta.
Non perdit tempus Mazzarri e fait intrai Godin e Strootman e ci bogat Carboni cun Deiola. Ci provant, a nai sa beridadi is sardus e a s’ora de giogu ndi boddint su palu de sa janna de Vicario, portieri de ocannu passau de su Casteddu, cun Keita.
Ma est sempiri s’Empoli a cumandai e, a innantis Pinamonti e dapoi Zurkowski, andant acanta de segnai.
Erribat aici su gol de dus de is piciocus de Andreazzoli cun d’unu bellu tiru, chi acabat a suta de sa traversa, de Stulac. E funt dus!
A suta de dus Mazzarri ci bogat Walukiewicz e Lykogiannis po fairi intrai in campu Caceres cun Gaston Pereiro. Iat depiri mudai calencuna cosa, invecias est ancora s’Empoli a ndi boddiri sa travers e su palu cun Henderson e Bajrami.
Acabat aici sa partida. E dominigu chi benit po su Casteddu lompit una partida dificili meda: in su “Diego Maradona” cun su Napoli. Tocat a ddu nai ca sa bocia est tunda?
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.calciowebpuglia.it/cagliari-0-2-empoli-colpo-dellempoli-allunipol-domus/
