Calencuna dì a pustis de sa strasura chi at strumpau a Crara Ferragni, cun sa multa manna de s’Antitrust po ariri bendiu su pandoru cun sa firmau de issa cun “dd’una pratiga cumerciali fartza”, in domu de sa picioca lombarda s’alluit un’atru disacatu. In chistioni iant essiri is ous de Pasca Manna de Dolci Preziosi, sa compora de is calis iat airi agiudau su progetu de beneficentzia “Is pipius de is Janas”, associu pesau po agiudai is pipius e is piciocus autisticus. Ma a s’acabbu su dinari, a s’associu, funt lompius feti de sa sola azienda de durcis, po unu totu de, prus o mancu, trintases mila eurus in dus annus. S’imprendidora, chi po su marchiu cosa sua in is ous at erriciu in is matessis dus annus unu milioni e duxentus mila eurus, no at donau nudda.

Aici comenti po sa chistioni Balocco, sa compora de is ous e s’arregalu a s’associu no ant tentu peruna relata, comenti invecias is publicidadi iant fatu cumprendiri. Cunfromma a is pandorus, adogna manera, is ous de ciocolatu non funt stetius becius a unu pretziu meda prus artu. Francu Cannillo, meri de sa Dolci Preziosi, at spiegau ca “sa Ferragni est stetia pagada po airi donau sa faci sua. Nosu eus donau dinari a s’associu, ma po issa non fut in su cuntratu”. Chistioni chi at cunfirmau finas Francu Antonello, pesadori de s’associu “Is pipius de is Janas”, po su cali sa pensada de s’azienda a su cumentzu fut cussa de scriri chi su dinari devolviu iat essi stetia acapiada a is comporas ma “nosu non dda eus pigada in cunsideru”. Antonello, prus de una borta, at cicau de fueddai cun sa Ferragni po ddi chistionai “ma non est mai stetiu possibili”. Su pesadori de s’assotziu non atacat mancu su spantu po su dinari donau a Crara Ferragni in relata ai cussu donau po su progetu sociali. Ddu at declarau feti in tres fueddus: “Est una bregungia!”.

 

 

 

 

Màuru Mura

 

 

Martis, su dixiannoi de mesi de Idas de su 2023

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

Foto: https://www.gazzetta.it/gossip/19-12-2023/chiara-ferragni-le-uova-di-pasqua-come-il-pandoro-spunta-il-vecchio-caso.shtml