Giorgia Meloni si torrat a biri cun Ursula Von der Leyen in Roma a pustis dus mesis de su primu atobiu istitutzionali.
Est mudau totu de candu si furint bistas in Bruxelles a su cumenzu de su mesi de Sant’Andria, candu sa Meloni fut de pagu Presidenti de su Consigliu. Immoi sa difidentzia e s’atentzioni funt andadas a un’ala. S’Italia tenit prus froris de podiri presentai a s’Europa: po immoi at rispetau totu is scadentzias, at amostau una manovra chi ponint is contus in ecuilibriu e bolit pediri de aumentai su Pnrr po ddu torrai a portai a s’atualidadi.
“Un ocasioni manna”, faint sciri de Palazzo Chigi, po “s’ascurtai castienduru s’atobiu de su Consigliu Europeu de su noi e dexi de friargiu, intregau massimamenti a s’economia e a sa migratzioni”. E po “torrai”, de parti de s’Italia, “s’impignu in pissu de su Pnnr”.
A pustis airi cundennau is sciollorius de su Brasile e torrai a cicai de donai un’agiudu a s’Ucraina, is duas presidentis ant cumentzau a fueddai de una chistioni centrali de su Consigliu Europeu de su noi e dexi de friargiu, est a nai is agiudus a s’Industria Ue: est, custa, sa cuntierra chi Von der Leyen bolit binciri de immoi finas a s’istadi chi at a benni, cussa de fairi nasciri un’Inflaction Reduction Act de s’Europa po arrespundiri a sa lei po s’inflatzioni de is Stadus Unidus. Cuntierra chi agatat s’Italia a favori, comenti narat sa Meloni torrendu a nai ca est de fundamentu un’arrespusta europea.
Von der Leyen, faint sciri sempiri de Palazzo Chigi, est abarrada cuntenta meda de su trabagliu fatu in Roma finas a immoi in pissu de su Pnnr e at cumbidau “a sighiri aici” sa delegatzioni italiana.
Atra chistioni de importu mannu est cussa de is migrantis. Giorgia Meloni at torrau a nai ca is lacanas europeas andant difendias e de intervenni in is Stadus de origini de is migrantis. Fintzas in custa chistioni sa Von der Leyen at donau un’arrespusta bona po sa Meloni, ma at essi dificili meda chi si ndi fueddit in friargiu.
Màuru Mura
Martis, su dexi de gennargiu de su 2023
Foto: https://www.rainews.it/maratona/2023/01/incontro-tra-meloni-e-von-der-leyen-il-confronto-su-emergenza-migranti-e-pnrr-180c0ca7-2935-4fa9-ad73-1d532f61e257.html
