Est mortu Umberto Bossi, chi s’agataiat in su spidali de Circolo de Varese. Bossi chi nd’at pesau a innantis sa Lega Lombarda chi poi est diventada sa Lega Nord, teniat otantacuatru annus. Po totus, de sa bia de unu chi est imbucau in Palatzu Madama, fut lamau “Senatùr”. A cantu si scit est de dì innnanti de eriseru chi s’agataiat in su spidali ca fut postu mali.
“Totu sa genti de sa Lega est posta in tristura manna e cun ateretantu dolu po sa morti de Umbertu Bossi chi at postu in peis su partidu nostu e seus a su costau de sa familia. Totu is atobius de su partidu in di dde oi non s’ant a fairi”, est cussu chi at scritu sa Lega. Aciungendu finas ca su segretariu Mateu Salvini at a torrai de s’Ungheria a Milanu cantu prus coidendu. Is su merì adduru de eriseru lompit finas su saludu de su ministru: “Coragiu, geniu, passioni, amori, rivolutzioni, arreiginis e libertadi. Tenia dixiaset’annus candu t’apu atobiau e m’as cambiau sa vida. Oi ndi tengiu cincuantatres e ti saludu, in sa di de sa festa de su Babbu, cun dd’una lambriga, ma finas torrendudì gratzias. Nos as imparau a non lassai a perdiri mai. Totu sa genti de sa Lega ti torrat gratzias e at a sighiri su caminu chi nos as amostau: cussu de sa Libertadi. Adiosu Capu. A Deus.
De Palatzu Chigi lompit s’arregodu de sa presidenti Giorgia Meloni: Umbertu Bossi, cun sa passioni politica chi teniat a intru, at sinnau unu tempus de importu mannu de is contus italianus e at donau unu agiudu mannu a su pesamentu de su primu centrudresta. In cust’ora de dolu mannu, soi acanta a sa familia e sa genti de sa Lega”.
S’interru de su “Senatùr” at essi in Pontida ca de sa Lega est su simbulu prus mannu. Sa decisioni dd’at pigada sa familia “po cumpartziri s’urtimu passagiu cun sa genti de sa Padania e sa familia manna de sa Lega etotu”.
Foto: https://www.ilfattoquotidiano.it/2026/03/19/umberto-bossi-morto-fondatore-lega-news/8330024/
