Su centrumanca bincit, chena farta, su segundu turnu de is aministrativas, bincendu in citadis medas de is prus mannas. Su centrudresta poderat in Lucca, Frosinone, Goritzia e Sesto Santu Giuanni, ma su centrumanca bincit in Verona, Parma, Piacenza, Catanzaro, Monza, Cuneo e Alessandria. Vitorias chi, in calencunu logu passant a sa storia. In Verona, est a nai, su centrudresta perdit a pustis de cuindixi annus, cun Damiamo Tommasi, giogadori de fubalu beciu de sa Roma, de su Verona e de sa Natzionali puru, candidau de una lista civica poderada de su Partidu Democratigu, chi pigat su 53,44% de is preferentzias. Sboarina, chi fut su candidau de su centrudresta, si frimat a su 46,66%.
“Sa spera est chi sa genti torrit a si pigai su ruolu de protagonista – funt is primus fueddus de Tommasi- poita sa citadi si ddu miniescit. Sa spera mia est cussu de fairi sa parti mia in custa coalitzioni. Custa allirghia, at aciuntu Tommasi, bolit nai ca non fut facili e non ddu at essi. Ma nosi seus postus in giogu po fairi calencuna cosa chi Verona s’aspetaiat de tempus meda. E seus prontus a ci ponni sa faci in is cosas prus dificilis puru”.
Duncas a s’acabu seti sindigus, de is citadis prus mannas, andant a su centrumanca, cuatru a su centrudestra, 2 a is listas civicas. Cun cincu citadis chi mudant de una parti a s’astra, de destra a manca (Verona, Monza, Alessandria, Piacenza e Catanzaro) e una a s’imbessi, Lucca.
A votai furint lamaus feti in dus Milionis in sessantacincu cumunus, ma po is partidus fut de importu mannu. Bascia sa percentuali de chini est andau in is gabinas eletoralis: su 41,6%.
“una vitoria prena, is fueddus de su responsabili de is democratigus Franciscu Boccia, eus fatu meda de prus de cussu chi no s’aspetiaus e bolit nai ca su trabagliu, candu est fatu beni, pagat”.
28 de làmpadas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.agi.it/politica/news/2022-06-27/chi-e-damiano-tommasi-sindaco-verona-17237906/
