In Venetzia is giogadoris de sa Dinamo a pustis airi giogau beni meda iant perdiu sa partida contras de una scuadra forti de averas. Is tifosus non funt allirgus e iant cumbidau is giogadoris a ndi tirai a foras sa barra e sa gana, po abarrai in fueddus galanus. Custa borta, invecias, totu si podit nai a is piciocus de s’allenadori Bucchi, ma non de non airi amostau gana e barra, bincendu una partida in Reggio Emilia in manera crara chi prus crara non si podit. E custa borta is sulidus e is morrungius (massimamenti: “nosu boleus genti chi gherrat) funt stetius po is giogadoris de domu. Cussu chi non si ponit in cunsideru mannu est ca intru de su bolli e de su podeus ddue funt is aversarius e podit sussediri de agatai una Dinamo prus mala de is tropus batostas chi at pigau in su gironi de andada.
Est facili meda immoi a nai ca sa vitoria de is sassaresus est depia massimamenti a su pagu cosa de is emilianus, chi funt is urtimus in classifica. Si scarescit de nai ca Reggio Emilia sa cida passada iant bintu cun Pesaro chi est sa cuarta in classifica e in segus iat bintu cun Treviso chi sa cida a innantis iat bintu cun Venetzia. Un’ata cosa scarescia est cussa de nai ca s’Unahotels fut urtima ma a feti cuatru puntus de is sassaresus. Est una serie A de basket stramba meda, chi non si fut cumprendiu, aunia totus podint binciri cun totus, finas su Napoli, in crisi manna, podit binciri cun Milanu e Tortona, sa matessi scuadra, custa, chi iat perdiu in domu cun sa Dinamo.
Cuusu chi non si ponit in cunsideru est ca si podit atobiai unu giogadori spantosu: in Reggio Emilia non ddue creiant, a pustis ant bidu Gerald Robinson e ant mudau idea. Su play, chi finas a calencuna cida a immoi at fatu pagu cosa, at giogau una partida bona meda e is tifosus de Reggio Emilia ddi ant batiu is manus candu Bucchi ddu at fatu bessiri candu mancaiat unu minutu a s’acabbu de sa partida.
“ Soi cuntentu meda, fut de importu mannu a binciri custa partida, massimamenti po sa classifica – at nau su regista de Nashville –. A dolumannu seus a foras de sa Copa Italia, ma immoi depeus giogai pensenduru partida a pustis de partida. Comenti apu giogau? Non tengiu perunu interessu personali, at bintu totu sa scuadra”.
Cun dd’una classifica aici curtza, aunia sa zona playoff est a dus puntus, ma finas cussa playout est a sa matessi distantzia totu podit sussediri. Bastat a ddue creiri, comenti in Reggio Emilia.
Màuru Mura
Martis, su dexi de gennargiu de su 2023
Foto: https://www.basketmarche.it/2022/06/07/serie-girone-unico/dinamo-sassari-rinnovo-anche-gerald-robinson/93601
