“Is contus de is dis passadas nos ant postu arriolu, finas poita teneus, de sempiri, pensamentus chi nos ant agiudau a andai a innantis comenti cussu de s’etica. Seus dispragius medas chi sa pensada nosta no est stetia cumprendia, ma eus a agiudai is indagadoris ca seus cunvintus de aiti tentu fidi bona e eus a sighiri a ponni sa calidadi de amostai a chini comporat in Italia e in su mundu, finas po protegiri chini est acapiau a s’azienda, cumentzendu de is familias chi trabagliant cun nosu”.

Aici narat su paperi de sa sociedadi de durcis de Fossano, in sa provincia de Cuneo, sa cali presidenti est Alisandra Balocco, chi est in mesu a s’indagu de sa procura de Milano po “is pandorus grifaus” de Chiara Ferragni. “Eus a sighiri a fairi beni, comenti sussedit de tempus meda, ponendu cun fortza ancora prus manna is valoris chi teneus de sempiri”, sighit su paperi.

“De prus de un’annu, e massimamenti in is urtimas cidas, – si ligit galu – agataus novas chi non funt beridadi, finas poita non si connoscint beni e forsis funt stetias cumprendias mali e calencuna bia serbint po chistionai mali de nosu”. Balocco “est una sociedadi ghiada de sa matessi familia de cuasi unu seculu, chi fait fueddai is cosas bonas chi feus. Teneus unu stili de familia chi est cussu de trabaglia e de non si ponni in mostra”.

In prus a sa chistioni de “is pandoros grifaus” de sa influencer Chiara Ferragni, is indagoadoris ci bolint biri beni in is chistionis de is ous de Pasca de s’azienda Dolci Preziosi, de sa pipia de tzapulu Trudi e de atras chistionis aunia benit postu in pumus artus sa pensada de ponni dinari in beneficentzia. Eus a benni a biri chini tenit arregioni intru de Chiara Ferragni o sa Balocco. Po immoi a chini comporat su scioberu, ca tantis cosa bona si nd’agatat in totue e non mancat in is butegas.

 

 

 

Màuru Mura

 

 

Cenarba, su bintinoi de mesi de Idas de su 2023

 

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://ilfattoalimentare.it/chiara-ferragni-pandoro-balocco-scuse-donazione.html