Custu documentu chi imprentamos est nàschidu de barant’annos innanti de oe e si riferit a una gara in Borore in su mese de Santu ‘Aine de su 1981. Est una disputa de sustàntzia, ondrada e irrichida a ispantu dae paritzas bessidas geniosas. L’amus a imprentare tota, comintzende cun s’esordiu e amus a sighire cun su restu de sa cantada: duos temas, duinas, batorinas e modas.

Cando an fatu sa gara de Borore tiu Peppe teniat 67 annos e tiu Antoni Piredda 76.

 

 

  1. Sozu

………………………………

………………………………

………………………………

………………………………

………………………………

………………………………

………………………………

………………………………

 

  1. A. Piredda (

……………………………………..

……………………………………..

………………cando fia pius giovanile

tantas boltas bos apo diveltidu.

E, Borore, istadu ses gentile

chi m’as in dogni gala cumpatidu

e cun totu chi non so a s’aurora

comente tando cumpàtimi ancora.

 

  1. Sozu (1’03”)

Borore est chi ti at tentu sempre istima

da cando ses bessidu dae domo.

Ma, Antoni, una cosa ti fentomo

a riguardu ’e poesia e rima:

mi parit chi comente cantas como

tue no b’as cantadu mancu prima.

No ti contes poeta retrocessu

ca sa vena mi parit in progressu.

 

  1. A. Piredda (51”)

Si so acantu a dare sos adios

a s’otava rimada e a su cantu

ca oramai apo fatu su tantu,

esauridos sun sos versos mios.

Tue mi cheres dare calchi ’antu

prit’as bidea ’e mi ponner in brios,

nelzende: ”Antoni, como cantas bene”

ma mancari lu nelzas no ti crêne.

 

  1. Sozu (1’00”)

Ma s’esseras bistadu pius lentu

de no resìstere a peruna isfida!

Ma faghes dogni tantu un’atrivida

a dogni versu faghinde cummentu

e cussu est totucantu isperimentu

ch’an aggiuntu sos annos de sa vida.

E si creschinde sun sas poesias

mala paga a Deu non li dias.

 

  1. A. Piredda (58”)

No li so dende paga indecorosa

ca sa zente aiscultat e s’ispassat.

Però s’edade calchi mancia lassat

ca sa ’etzesa diventat pesosa

e-i su tempus chi ’enit e passat,

passende si che leat calchi cosa.

E no solu chi deo fia in crisi

ma mancu tue pares su chi fisi.

 

  1. Sozu (59”)

Caminende, camino imbola-imbola

ma deperidu non so a sa cara.

E tue puru, Antoni, ti consola

e-i su ch’as in mente canta e nara

ca so convintu chi una note ’e gara

selvit nessi pro mes’annu ’e iscola.

Cantu sos annos che pigan a susu

sun iscolas chi faghes de piusu.

 

  1. A. Piredda (52”)

Peppe, as fatu una bella improvisada,

s’otava ti l’as bene costruida.

Sa carriera mia est tramontada

e da ch’est molta no torrat a vida:

prima tenia sa mente ischidada

ma como tenzo sa mente drommida.

Prite s’edade, lu podes ischire,

finas sa mente faghet a drommire.

 

  1. Sozu (56”)

Non penso chi dormida si est sa mente

e no t’at s’amnesia fatu dannos.

Ja si nd’agatat rimbambidos mannos

ma non rimbambin totu egualmente

ca Pertini, su nostru presidente,

at ja cumpridu otantachimb’annos,

e parit de su briu a s’aurora

ca rimbamdidu ja no est ancora.

 

  1. A. Piredda (51”)

Tue ses pius gióvanu in sas galas

e de s’edade mia non ti seras,

ca sun setantasete primaveras

sas chi Piredda bi at subra sas palas:

be-i nd’at bonas e be-i nd’at malas,

bi nd’at pesantes e bi nd’at lezeras.

E cantu pesan sas betzas e noas

l’as a poder ischire si las proas.

 

  1. Sozu (58”)

Si torras a tocare cussu tastu

non ti mineto cun legges severas.

Ma si ti dana un’argumentu in pastu

podes bolare in sas altas isferas

ca tzeltu setantasete primaveras

no an a tie sa conca guastu.

Antzis mi paris giagadu in chelveddu

pius meda de cando fis piseddu.

 

  1. A. Piredda (56”)

Su paragone chi as postu a fiancu,

o Peppe, pensa chi no mi at confusu

chi s’edade sas foltzas mi nde at tusu

so diventadu ispilidu e biancu

ca tue tenes no’annos de mancu,

deo apo no’annos de piusu.

E si abbarras cantende àteros noe

mi’ chi no cantas cantu cantas oe.

 

  1. Sozu (1’05”)

Po cussu non ti ch’altzes a sa nue,

sas gitas mias mi las apo fatas

e ja so incanidu in cadaratas,

como nieddu no torro a igue,

e de otavas peri sas piatas

ja nd’apo semenadu cant’e tue.

Ma cheria sa zente sodisfàghere

ca ancora b’amos caminu ’e fàghere.

 

  1. A. Piredda (52”)

Peppe, s’atentu bistas e atuas

atzeta sas leales teorias.

Tue as cantadu meda e no lu cuas

e semenadu as saldas poesias

ca tue semenadu asa sas tuas

e deo semenadu apo sas mias.

Cussa est diferente cumpeténtzia

ma b’amos in s’edade diferéntzia.

 

  1. Sozu (58”)

Ja non an a torrare sos beranos

cando si sicat su fenu in s’istiu.

S’a una gara li damos s’aviu

no pianghemus essende antzianos

ma faghinde a bider chi su briu

ancora amos ch’essende giovànos.

E a da chi b’andamos a piata

no lassamos sa gara sentza fata.

 

  1. A. Piredda (1’03”)

Sas galas s’an a fagher in totue

poite in s’isperàntzia bi creo.

Però, Peppe, sa palte si mi leo

para s’orija e cumprende igue:

deo istadu so su chi ses tue,

tue no bistas, no, su chi so deo.

E a narrer no ti deves atrivire

in cuss’edade cantu est su patire.

 

  1. Sozu (1’03”)

A mi lassas istare su piantu

ca da chi est tropu diventat bacanu?

Ja l’ischimos ch’atraessadu as tantu

ma ringràtzia a Deu chi ses sanu

e si che frimmas in su sardu cantu

t’amos a dever faghere capitanu.

Oltres chi faghes proa in su duellu,

ses po edade su capu drapellu.

 

  1. A. Piredda (50”)

Para s’orija, iscùltami e cumprende

ca ja ses un’iscultadore ’onu

e-i sa palte tua ses fatende,

no peldes mai su tempus in donu.

Deo ti so tratende un’arrejonu

e no mi nelzas chi so pianghende

e a sa zente no li nelzas gai

ca Piredda no at piantu mai.

 

  1. Sozu (1’08”)

Bravu, si cussa frase l’apo intesa

no creo invanu sa ’uca l’abbelzas.

Pùntalu su merinu cun grandesa

isperende chi su bersagliu felzas:

non bistes pianghinde sa ’etzesa

e cantos annos tenes no los nelzas.

E isprica ogni donu naturale,

sos annos contan a un’animale.

 

  1. A. Piredda (51”)

Si ses in s’ou chilchende sa tudda

da su fiancu tou no m’iscapo:

a modu meu sa gala la tzapo

e no mi toches custa e ne-i cudda.

Si apo nadu cantos annos apo

mi’, Peppe Sozu, no b’at postu nudda:

e a ite ti giras tichi-taca

si no bi pones nudda dae busciaca?

 

  1. Sozu (53”)

M’as nadu chi fis cùcuri-biancu

chi sa chelvija as in colore ’e nie

e deo ti rispondo rie-rie:

de cust’edade nde fetas a mancu.

Si m’an postu in su palcu a su fiancu

tzeltu chi devo rispòndere a tie

e no mi poto in s’idea distràrrere,

si no nara ite deo devo nàrrere.

 

  1. A. Piredda (47”)

Ti fia nende chi intro de un’ou

Peppe, bi fis chilchende calchi neu.

Naro su giustu ca lu cheret Deu

e so capatze a nde dare su prou:

a cantas, Peppe Sozu, a modu tou,

deo devo cantare a modu meu.

E faghimos sa gala nois duos,

no b’at bisonzu ’e sos consizos tuos.

 

  1. Sozu (47”)

Antoni, ti nde pesas airadu,

est de s’unda arrivende sa piena.

T’apo nadu ch’as forte sa carena

e chi ancora no ses imbetzadu:

ite dêt esser si t’aio nadu

a ti ch’andare a Casa Serena?

Po mi mustrare ingratu e ostile

chi m’aias puntadu su fusile.

 

  1. A. Piredda (49”)

Deo no palto ’e vanas fantasias

ca sos consizos bonos los onoro.

Ma cantende sas sardas poesias,

mi’, totu su chi lughet non est oro

e si, Peppe Sozu, nadu mi l’aias

ja mi che fia andadu a bonu coro.

Antzis, chilcadu ti aia inie

unu postu po che leare a tie.

 

  1. Sozu (48”)

A bides chi cuadrat s’arrejonu?

Nde ’ogo su conigliu dae sa tana

poite ’e su furitu so padronu

po chi ti palfat una idea istrana

ca si m’aferro in manu su sonu

naras chi de ballare no nde as gana.

Ma si ti ponzo su pê in su gallu

a pagu a pagu inìtzias su ballu.

 

  1. A. Piredda (47”)

Bides Piredda chi est sempre gentile

e at cun sos collegas riggualdu.

Pro chi como ’e s’edade sia a taldu

no mi deves puntare su fusile

e si no ballo unu ballu tzivile

ap’a ballare calchi ballu saldu.

E so capatze a nde dare su prou

chi deo apo balladu prima tou.

 

  1. Sozu (59”)

Tzeltu chi balladore ti ana ’idu

e no est custa una iscena noa.

Chelz’in su palcu sempre a fagher proa

poite ses brillante e atrividu

ma si ses che tostóine drommidu

tando bi cheret su fogu in sa coa.

Tando in sos sognos no t’incantas:

ti nde pesas, ischéltias e cantas.

 

  1. A. Piredda (51”)

Cand’arrejonas gai ’e bonumore

ti favorin sas musas totas noe

e ses de sos consizos un’eroe,

ses veramente un’arrejonadore.

Però chi fit Piredda balladore,

Peppe Sozu, l’ischias prima ’e oe

e mancari rassu sias e maduru

si mi mov’eo ballas tue puru.

 

  1. Sozu (52”)

Deo ja l’isco chi ses balladore,

si l’as nadu non mi nde meraviglias.

Ma a boltas da chi t’’io ’e malumore

ja ricurro a-i custas parapiglias

poite a unu caddu curridore

bastat a li sonare sas ischìglias.

Che cancellat su sou umore malu

e currinde si ch’’idet in su palu.

 

  1. A. Piredda (53”)

Si cheres allegrare s’iscenàriu

controllende su tou paragone,

Piredda est sempre ’istadu volontàriu

no b’at bisonzu ’e li pungher s’isprone.

Però est Peppe Sozu a su contràriu

ca naran ch’est unu pagu mandrone:

cando su caddu tou non coitat

a s’ora cuss’isprone bi meritat.

 

  1. Sozu (53”)

Non fit de mi lu narrer netzessàriu

e ti nde dao ispiegatzione.

A da chi mi so móvidu a oràriu

sentza timire ’e pista s’istradone

e no est giustu a mi narrer mandrone

da chi so dimustrende su contràriu.

Volontàriu no curro e ne bolo

però da chi ti frimmas mi che colo.

 

  1. A. Piredda (53”)

A bistas frimmu in s’arrejonamentu

e la tenes sa limba pius retenta?

Ma nde faghet sa zente unu cummentu

sa chi po iscultare bi est atenta:

a Sozu sempre in meritu lu an tentu,

solu li naran chi at sa marcia lenta.

O Peppe Sozu, a la faghes sa proa

a ingranare una marcia noa?

 

  1. Sozu (1’01”)

Tue mi l’as nadu ischeltza-ischeltza

pensende ch’eo cumbino una falta.

Ti lu so ripitinde a boghe alta

chi si tiro sa balla no andat leltza

e si mi bastat caminare in teltza

deo manco l’ingrano sa cualta.

E so seguru chi a su tragualdu

tzeltu non b’arrivo pius taldu.

 

  1. A. Piredda (46”)

Su paragone chi as batidu in vista

mi pienat de coriosidade.

Ammito chi ’e sa gala ses artista,

no guasto sa tua abbilidade,

ma si fis bistadu unu bonu autista

cultu aias cun velocidade.

Però a guidare no bi proes

prite ti colat unu carru a boes.

 

  1. Sozu (48”)

Mi paret unu paragone istranu

a comente rifleto e considero.

Non m’apo a meritare mai zero

fin’a chi Deu a mie lassat sanu

e da chi devo arrivare su sero

ja no arrivo s’àteru manzanu.

Ch’ap’a arrivare ’e sa montagna in chima

si poto, antzis, unu minutu prima.

 

  1. A. Piredda (48”)

Pòneche a una parte su fragassu

e lassa custas cosas a un’ala.

Ti so nelzende, po fagher ispassu,

però no palto de idea mala:

da cando comintzada s’est sa gala

no as ancora allegradu su passu.

Chelzo sa veridade chi mi proves:

o Peppe Sozu, e cando est chi ti moves?

 

  1. Sozu (54”)

Non b’at mancu ’e nde tenner paura

ca resto a frases gai indiferente.

E, caru Antoni, si mi pones mente

est s’introdutzione a chiusura:

pagas otavas de bufonatura

an ischidadu su sonnu a sa zente.

Non creo male andadu siat goi

e-i sa gara si at a fagher poi.

 

  1. A. Piredda (50”)

Si s’esórdiu benit terminadu

s’est chi su cumitadu no…….

Mi’, no fia cantende prosumidu

chi apo solamente bufonadu:

deo mi leo su ch’apo retzidu,

tue ti leas su chi t’apo dadu.

Est unu jogu ’e curiosidade

ma ja b’at unu pagu ’e veridade.

 

 

Màuru Mura

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: Archivio Domus de Janas