Finas oi s’Ucraina si nd’est scidada cun su sonu de is sirenas po avertiri sa genti de is atacus de is aereus russus. Sirenas chi ant sonau de is cincu de merì finas a su mesunoti.
E de is Stadus Unidus lompit una bogi chi fait a timiri: “Putin – narat su presidenti americanu Joe Biden – s’agatat cun is palas a muru e po nosu est pensendu de umperai arrmas chimicas e biologicas”. At essi feti po fairi timiri, comenti umperaiat Bush candu chistionaiat de Saddam o at essi beridadi?
Stadus Unidus e Gran Bretagna fueddant de dificultadis massas de is sordaus russus, comenti ant finas nau sa noti passada is ucrainus etotu. A parrir de is matessi ucrainus is sordaus de domu anto torrau a pigai sa zona de Makariv, chi s’agatat a sessanta chilometrus de sa capitali: “Eus torrau a ponni sa bandela ucraina in sa citadi e is sordaus russus ddus eus stesiaus”, faint sciri is militaris.
Abarrant in poderi de is russus s’andala de terra cun sa Crimea e s’intrada a su Mar d’Azov, ma, po cussu chi narant de Kiev sa cosa de papai e bufai at acabbai in tres dis.
S’Onu, in su fratempus, at giai donau is primus numurus po cussu chi pertocat is mortus intru de sa genti cumuna: 925. Ma po cussu chi narat s’Unhchr custu numuru est distinau a si pesai in pagu tempus.
Iant bolli a sighiri finas is atobius de sa diplomatzia e Volodymyr Zelensky at pediu de fueddai cun Vladimir Putin, “in calechisiat manera”, nendusì prontu a torrai a biri cussu chi est giai scritu in pissu de is republicas de limba russa e de sa Crimea e nenduru finas ca “chena custu atobiu non si podit cumprendiri de averas comenti is russus podint frimai custa gherra”.
“Chena acordiu non frimaus sa gherra”, at nau Zelensky, acrarendu ca s’Ucraina “non podit acetai perunu amelessu de sa Russia” e ca “is garantzias de seguresa depint essisi un’obrigu”.
22 de martzu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.rainews.it/articoli/2022/03/zelensky-lesercito-russo-non-riesce-a-trovare-i-nazisti-e-neanche-la-strada-di-casa-1e4954f9-a1c2-409e-b744-50abf1c834f9.html
