Novas bonas de s’Isula sarda aunia is impestaus calant ancora, finas chi funt galu medas: in su bulletinu regionali si chistionat de centucorantacuatru in pissu de 2.178 tamponis, cun sa percentuali a su 5,6%.
Candu ci funt novas bonas chi allirgant su coru tocat a castiai finas cussas malas chi nosi faint abarrai cun is peis in terra: atrus tres mortus, una femina de corantanoi annus e un’ominidi de sessantanoi chi biviant in sa citadi metropolitana de Casteddu e un’omini de setantanoi de sa provincia de Nugoro.
Po giogai sempiri cun is numurus e cun su contru intru novas bonas e legias tocat a castiai cun atentzioni is contus de is spidalis: sa nova bona est ca funt dus de mancu is personis chi s’agatant in is spidalis, de 233 a 231; sa nova mala est ca in terapia intensiva ndi funt imbucaus dus in prus e imoi funt bintiseti!
Is impestaus nous s’agatant massimamenti in sa citati metropolitana de Casteddu e in sa provincia de su Sud Sardigna: sessantases in sa prima e corantases in sa segunda. Is atrus trintadus funt invecias aici dividius: binticincu in sa provincia de Tatari, cincu in sa provincia de Aristanis e dus in cussa de Nugoro.
Funt sanaus in norantanoi e in 6.455 funt acorraus in domu.
Cussa chi est intrendu at essi una cida aunia sa Sardigna tenit sa spera de non ci dd’acabai in zona groga, ca de s’acabu de su mesi de austu at erriscau meda. S’Isula e sa Calabria abarrant is regionis chi benint castiadas cun importu mannu po is impestaus e po is numurus de is spidalis e s’erriscu de sighiri sa Sicilia, ca est groga de una cida, est mannu. Gana de torrai a biri is maschereddas in logus foras e de torrai a biri tzilleris e ristorantis cun regulas craras non ddi tenit nemus, po cussu tocat a donai croba cichendu de sighiri cussu chi nosi benit nau. Totu, est a nai, s’at a decidiri de cenarba chi benit.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.repubblica.it/cronaca/2020/10/26/news/domande_e_risposte_asintomatici_presintomatici_e_tamponi_ecco_cosa_c_e_da_sapere-271927403/
