“Soi andau a chistionai cun sa presidenti de su Consigliu, Giorgia Meloni, po ddi torrai a nai sa beridadi de is fueddus chi s’agatant in sa litara spedia custu mengiau a su giornali ‘La Stampa’: mai unu euru de su miisteru, mancu unu cafeu, est stetiu umperau po viagius de sa dotoressa Maria Rosaria Boccia chi, po cantu pertocat s’aprontamentu de su G7 Cultura, non est mai imbucada in perunu paperi chi non podiat biri”. Funt is fueddus de su Ministru de sa Cultura, Gennaro Sangiuliano, dapoi de s’atobiu cun sa Meloni chi est durau po un’ora e mesu.
In sa litara mandada a La Stampa si ligit: “Apu connotu sa dotoressa Bocia in sa metadi de su mesi de maju intru de sa torrada eletorali de is europeas e mi soi acatau de tenni pensadas ogualis in calencuna chistioni. A pustis apu pensau de donai, a Maria Rosaria Bocia, s’incarrigu, chena dda pagai, de consiglieri de su ministru po is atobius mannus. In segus, ponendu menti a su ‘Gabinetto’ chi mi narat ca ddue podiat essiri calencunu interessu, apu decidiu de non si ndi fairi nudda e ddu apu nau feti a fueddus. No est sa bia de unu chi calechisiat istitutzioni pongiat in duda is pensadas chi si funt tentas a innantis. Intru de custu tempus no est mai sussediu chi sa dotoressa Bocia apat pigau parti a calencuna cosa de aministrativu. tocat a nai, ca est de importu mannu, finas chi mai su ministeru dd’apat donau un’euru.”.
A is fueddus de su Ministru at arrespustu sa matessi Maria Rosaria Boccia in Instagram: “Mai pigau dinari de su Ministeru? Deu sciu ca no apu mai pagau nudda, m’ant sempiri nau ca su ministeru torraiat su dinari spendiu de is consiglieris, difatis dogna viagiu est stetiu aprontau de su capu segreteria de su ministru”. E in pissu a is fueddus de su ministru po sa chistioni chi issa no at mai pigau parti a is atobius po su G7: “Duncas non eus mai fatu atobius? Castiau is logus? No esus mai cumpartziu novas?”.
Màuru Mura
Mercuris su cuatru de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.today.it/politica/boccia-sangiuliano-storia-g7-incarico-pagato-ministero-cosa-sappiamo.html
