Po totus cussus chi ddu biant fut s’omini chi biviat in s’aeroportu. Su contu sou at postu in pensamentu a Steven Spielberg chi po custu at fatu su film “The Terminal” cun protagonista primu Tom Hanks. Ma cussa de cust’omini fut unu contu de vida de averas, fata, massimamenti de cuasi bint’annus bivius in s’aeroportu Roissy-Charles de Gaulle de Parigi. Immoi Mehran Karimi Nasseri non c’est prus: teniat setantot’annus, fut unu rifugiau politigu iranianu, e ddu ant agatau mortu in su terminal 2F.
Sir Alfred, comenti si faiat tzerriai, fut diventau famau in su 2004. Lompiant giornalistas de dogna parti de su mundu e andaiant a ddu cicai in s’aeroportu po ddu intervistai. Iat godangiau unu pagu de dinareddu chi dd’iant permitiu de si podiri permitiri un’aposentu in albergu. Ma su dinari est acabbau e tandu de tempus pagu fut torrau in su terminal chi in coru sou no iat mai lassau.
Fut nasciu in su 1945 in Masjed Soleiman, in sa provincia iraniana de su Kuzistan e si fut frimmau in su Roissy-Charles de Gaulle de Parigi a pustis de unu giru longu meda chi iat tocau is citadis de Londra, Berlino e Amsterdam: fut in cica de sa mamma. Dogna borta is autoridadis de cussus Stadus ce ddu iant stupau poita non teniat perunu document cun sei. In su 1999, giai fut ora, sa Francia dd’iat arreconnotu su “status di rifugiato” e un permissu de ddue abarrai, ma, forsis non fut postu beni de conca, si fut rifiutau de ponni sa firma in sa pratiga: “Non soi a nomini miu – iat spiegau po cantu contaiat sa cronaca de cussu tempus – deu non soi prus cussu chi fui. Immoi mi tzerriu sir Alfred Merhan e non soi iranianu. Babbu fut unu svedesu e mammai una danesa”.
Unu contu de un’amargura chi fait stringiri su coru e nosi fait cumprendiri comenti s’omini candu s’agatat in dificultadi manna est prontu a totu.
Màuru Mura
Giobia, su 17 de Sant’Andria de su 2022
Foto: https://www.amazon.it/Terminal-Edizione-Germania-Tom-Hanks/dp/B00005JMYC
