Totu serrau in Casteddu finas oi, mercuris su 21 de gennargiu. Sa decisioni de su centru operativu comunali est stetia pigada a sighimentu de sa cunfirma de sa criticidadi arta, est a nai allerta orrubia, amostada de sa Protetzioni Civili regionali.
Ant abarrai serraus is parcus e is zonas birdis, totu is scolas de is prus piticas a is prus mannas, is asilus, is campusantus, is mercaus citadinus giai in is areas obertas e giai imboddiadas (feti su Mercau de su pisci de viale La Plaia cun imbucada feti po chini ddue trabbagliat), is impiantus sportivus, is museus, is bibliotecas, is uficius publicus e s’Universidadi.
In cunsideru de s’allerta noa po tempus malu de codici orrubiu “sa decisioni est stetia pigada de cu Coc, su Centru Operativu Comunali, riuniu e cumandau de su sindigu Massimu Zedda in su mericeddu de eris”.
In su mentris si contant is dannus de s’abba a istrossa calada in is dis passadas in totu sa Sardigna. Est a nai puru ca non si contat genti morta e custu est cussu de prus importu. Ma tocat a donai una mirada finas a sa genti chi est in disisperu, comenti cussu sussediu in su Poetto, aunia s’abba meda at invadiu tzilleris e stabilimentus.
In duas dis de su celu est calada s’abba de cuatru mesis. Su caminu de sa 195 est stetia devastada un su tretu intru de Casteddu e Cabuterra. Familias medas funt stetias agiudadas intru de sa matessi Cabuterra e Sinnia e assuebamentus si funt amostaus, paricius, finas in su Nugoresu e in Cala Gonore dannus medas s’amostant in su portu e in calencuna domu.
