Prus de duas oras de atobiu po chistonai de sa lei finantziaria. ma is nuus abarrant. Difatis is capustrumas de is partis chi cumandant in sa Regioni, cun s’assessori a su Bilanciu Giusepu Meloni, sa presidenti de sa matessi Regioni Alissandra Todde, su presidenti de s’Assemblea Pieru Cumandini e su presidenti de sa Cumissioni de tres Alissandru Solinas si funt torrendu a biri in custas oras, a innantis de s’ascurtu de is portadoris de interessu, sempiri in is uficius de sa presidentzia de su Consigliu regionali in su pianu de ses de su palatzu chi est in s’orruga de Roma.
In sa mesa de s’atobiu s’at a fueddai de fairi cumpartziri dogna cosa po sa manovra chi lompit a cuasi dexi miliardus de eurus. Si chistionat giai de segai dinari in previsiioni de dognunu de is assessoraus po ponni su dinari a curriri aunia serbit de averas. Comenti si chistionat de ndi pesai unu fundu solu po is Enti Locali. Non parit invecias in peruna duda, po s’ora, is trinta milionis de eurus chi ant a serbiri po fundiri is aereportus regionalis.
“Un’atobiu chi est serbiu meda”, at nau s’assessori de su Bilanciu Giusepu Meloni, “eus chistionau, intru de atras cosas, finas de is regulas cun is calis crescit su fundu solu”. S’obietivu est cussu de “lompiri in Aula intru de s’acabbu de martzu e is primas dis de Arbili”. Po Alissandra Todde “custa est una finantziaria politica chi depit donai signalis de importu in is politigas socialis, a is categorias chi tenint abbisongiu de essiri ascurtadas, comenti cussa de is artigianus, e massiamenti a is Cumunus”.
Po is tregentus milionis chi si podint moviri: “Est prus pagu poita arregodu ca eus fatu unu mudamentu de importu, po su bilanciu, in su mesi de Sant’Andria de ocannu passau. Tocat a si ndi moviri, ma non s’agatat peruna arregioni po s’arriolai poita is treminis ci funt totus, duncas chini est a morrungius nendu ponendu in is pumus artus sa chistioni de su tempus, forsis no at castiau beni su calendariu”.
Màuru Mura
Martis, su dixiotu de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://cagliariturismo.comune.cagliari.it/it/vivicagliari/palazzo-del-consiglio-regionale
