S’Italia totu finas a su 31 de martzu chi benit est in emergentzia, ma parit, aici narat chini scit, ca non s’at andai a innantis aici. Ma calencunu obrigu at essi poderau su matessi. Ddu at nau su ministru de sa Saludi Robertu Speranza: “Cun ancora sessantamila impestaus dogna dì, at nau, iat essi unu sbagliu mannu a ndi tirai totu is regulas, calencuna depit abarrai”.
Duncas, de su mesi de arbili, eus a sighiri a umperai is mascherinas in logus serraus e a intrai in is logus pubricus cun obrigu de Green pass.
“Tocat a poderai is peis beni in terra”, narat sempiri Speranza, “poita su Covid no est chi pighit un’aereu e de su 31 de martzu e movat de atras partis. Su Green pass fait parti ancora de su sistema nostu po binciri su Covid e is mascherinas in logus serraus funt ancora de importu mannu”.
S’Aifa est pensendu de fairi su vacinu de cuatru po chini tenit atras maladias e Speranza puru tenit sa pensada chi su vacinu de cuatru possat serviri a totus: “Depeus biri chi serbat po totus, ma a pustis s’istadi. Est probabili meda, poita su virus no est chi ti stringiat sa manu e po si nd’andit po sempiri”.
Chi su vacinu siat de importu mannu ddu narant funas is studius de su Iss: chini at fatu su vacinu tenit probabilidadi de intrai in su spidali de noi bortas prus mannas cunfrontas a chini at fatu su “booster” e de dixianoi bortas de si morri.
De su primu de su mesi ch’intrat mudant is regulas e si cicat de torrai a cussa vida chi de dus annus a cust’ala est feti un’arregodu. Is stadius e is atrus logus aunia si fait sport si podint preniri de su 75% e de su 60%, de su dexi de su matessi mesi si podit torrai a papai in is cinemas e intrai in is spidalis a biri is familiaris chi si ddue agatanta e de su 15 de lampadas cussus chi funt in pissu de is cincuant’annus non tenint prus s’obrigu de su vacinu.
21 de friargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://twitter.com/robersperanza
