Sa Salernitana bincit cun su Venetzia e giumpat su Casteddu lassendusì a is palas finas su Genoa e su matessi Venetzia de Andria Soncin. De spantu cussu chi funt fendu is campanus de candu in sa panchina si ddu est setziu Davidi Nicola: in is urtimas 5 partidas nd’ant bintu 4 in pissu de cincu e una paregiada sa cida passada cun s’Atalanta. Imoi is piciocus campanus funt passaus de s’urtimu postu a sa zona chi arregalat sa serie A.
A s’Arechi, prenu che un’ou, acabat 2-1 po sa Salernitana chi fut giai a innantis a pustis seti minutus gratzias a unu rigori de Bonazzoli chi at lassau frimu Maenpaa, a pustis chi sa bocia fut sbatia in su brassu de Ceccaroni. Is campanus s’acostiant a su gol de dus, ma Caldara sarvat totu in sa linea de porta, candu fut acabendu su primu tempus de sa partida.
A su cumentzu de su segundu tempus is venetzianus parint prus barrosus e, a pustis una parada de Sepe po unu corpu de conca de Okereke agatant su paregiu cun Henry, prontu a ponni in porta un’atra respinta de Sepe a unu corpu de conca de Caldara.
Cumentzant a cambiai is giogadoris in campu is allenadoris e a su minute sessantaseti lompit su gol chi arregalat tres puntus de oru a is campanus. Ddu fait Verdi, chi nd’aprofitat che unu margiani de una faddina de sa difesa venetziana. Una borta chi s’agatat a innanti sa scuadra de Nicola no erriscat nuddda chi non po una punitzioni de Aramu chi carignat su palu. A pustis su Venetzia ce dd’acabat finas in dexi ca Ampandu ci benit bogau de su campu.
Imoi, chena atra partida de recuperai, sa classifica de su Casteddu si fait sempiri prus perigulosa. Is piciocus de Agostini s’agatant feti cun atras duas scuadras a palas cun bintotu puntus, unu de mancu de sas Salernitana chi est a bintinoi. Serrant sa classifica su Genoa cun 25 e su Venetzia, chi est cun d’unu pei e mesu in serie B, cun 22. Prus in artu, erriscant paghissimu su Spetzia e sa Sampdoria cun trintatres puntus.
Su solu consolu est ca su Casteddu tenit su distinu in is manus suas. Tocat a binciri dominigu in Salerno e totu s’at a aconciai.
6 de maju de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.napolimagazine.com/calcio/articolo/serie-a-la-classifica-la-salernitana-vince-ed-fuori-dalla-zona-retrocessione
