Chi eus fatu a bonus, chi eus sighiu is regulas in is atobius de primu dì de annu s’at a biri tra calencuna dì e totu. Cunfroma a su numuru de su 31 de Mesi de Idas, su prus artu chi eus tentu in Sardigna, is impestaus nous eriseru funt stetius 543 e, a dolumannu, tocat a contai unu mortu puru, una femina de setantatres annus chi biviat in sa provincia de Nugoro. Sighit a si ndi pesai su numuru de sa genti chi intrat in is aposentus de is spidalis: de eriseru si ndi contat unu in prus e imoi funt in dixiotu in terapia intensiva e in 174 in is atrus repartus, cunidixi in prus de sa dì a innantis. In 9444 funt incungiaus in domu, est a nai 328 in prus de s’urtimu bulletinu regionali. In sa matessi dì de ocannu passau is impestaus funt crescius de prus de duas bias: su 3 de gennargiu de su 2021 funt 194, ma si contaiant finas noi mortus de covid.

“A dolumannu – narat Ferdinando Coghe, diretori sanitariu de su Aou de Casteddu – at bintu sa pensada ca totu fut passau, duncas, si podit nai chena farta, ca sa genti no at donau crobba po nudda a is regulas chi iaus donau. No est beru ca eus postu lacana peruna a sa libertadi de dognunu, eus feti nau ca non tocaiat a festai in is prassas e invecias sa genti at festau chena peruna atentzioni”.

“Chini intrat in is spidalis no est prus gravi comenti sussediat a innantis poita su vacinu funtzionat – sighit a nai Coghe -, finas poita, po s’ora, sa varianti Omicron at impestau, in su Sud Sardegna, feti po su 24%, s’orrestu est ancora impestau de sa varianti Delta, chi prima bociat meda prus de imoi. Totu custu, torru a nai, est meritu de su vacinu”.

Chi is numurus sighint a abarrai custus est facili meda chi in atras regionis italianas at a mudai su colori: de cenarba chi benit sa Toscana e s’Umbria in grogu e sa Liguria in colori de arangiu, matessi colori chi at a tenni su Piemonti a intru de dexi dis e is Marche a intru de tres cidas.

 

Màuru Mura

 

Attività realizzata col contributo della Regione Sardegna – IMPRENTAS 2021-2022 LR 22/2018 art. 22”

 

Foto: https://www.adnkronos.com/variante-omicron-oms-rischio-resta-molto-alto_2GpYwWvoQphX51B52BrLQ9