De dus annus a custa parti non si festaiat sa Pasca Manna e su lunis de Pasca. Is regulas de su Covid non permitiant de si spostai de una parti a ‘atra de s’Isula. A pustis dus annus a totus est torrada sa gana ca, de averas, non si ndi podiat prus.

Sa Sardigna at torrau a agatai is turistas e is citadis sardas si funt prenas comenti non si biat de meda. Funt lompius in is costas, in is citadis de mari e in is biddas sardas prus galanas: parit ca si siant movius in sonumancu centubintimila.

C’at de nai ca sa crisi no est ancora posta de una parti e galu sa metadi de is struturas saint ancora serradas e su pretziu po lompiri de nosu est sempiri prus artu e po non chistionai de sa guerra, custus funt numurus chi donant spera manna po s’istadi chi benit: in s’aeroportu de Su Masu funt lompius intru de is corantacincu e is corantotu mila, in Salighera invecias binticincumila e in Terranoa corantamila, e in prus is croceristas e genti meda in is montis, e totu cussu chi si podit bisitai.

No est totu prenu, ma – comenti narant de sa Coldiretti –  po is operadoris turisticus si podint nai allirgus e totu custu fait pensai beni po is dis de sabudu, dominigu e lunis chi benint, ca funt atras tres dis de festa. Po non fueddai de su primu de maju, candu, e giai fut ora si podit festai Sant’Efis, ma massimamenti po s’istadi ca de nosu addurata finas a su mesi de Talamini.

De is cicas chi si funt fatas in custu 2022 funt prus o mancu trexi is milionis de turistas chi s’aspetant, chi bolint nai su 25% de ocannu passau). “Seus partendu cun su pei giustu – narat s’assessori a su Turismu Giuanni Chessa –. In is dis passadas is albergus de sa Sardigna de pissu funt prenus a su 70%, fina de ingresus e tedescus, Nos’aspetaus un’istadi chi si facat torrai a is tempus passaus e at essi aici, finas chi non eus a tenni is russus.

 

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.investireoggi.it/news/pasquetta-origini-e-curiosita-sul-lunedi-in-albis/