A pustis una bona pariga de paregius, su Casteddu ce dd’at fata a binciri una partida. Cun suferentzia, est beru, ma a sa fini at portau a domu tres puntus chi funt che-i s’oru. Beru est ca su Perugia, sa scuadra batia po 3-2 est urtima in classifica, ma ce dda ia fata a rimontai dus gol. E poi sa serie B est custa, dogna partida, finas chi nascit e si ndi pesat beni podit essiri binta o perdia. Decisivu, cun dus gol, Lionardu Pavoletti chi a s’acabbu de sa partida arrespundit a is criticas de is tifosus po sa scuadra de Liverani: “Agatai unu chi ti fait dogna  cosa legia cun is manus e ti pigat a sulidus, a pustis una vitoria, est tropu. Po mei est dificili, non ddu ia mai bidu e non mi ddu aspetaia innoi in Casteddu. M’ant scritu finas in is social, non podeus erribai a tantis, no andat beni po nudda. De seguru teneus calencunu problema, forsis non seus bonus a giogai, ma su coru e sa gana non funt mai benius a mancai. In totu is partidas, finas candu fustis perdendu, ci eus provau donendu totu: curpa nosta, ma fustis unius”.

Su centravanti livornesu tenit fidi: “Cun dus atacantis comenti de mei e Lapadula e in prus Zito Luvumbo, teneus armas medas po binciri is partidas. Depeus essiri prus cunvintus de is calidadis nostas, poita de seguru chi non ddu feus nosu po primus non ddu ant a fairi is scadras chi atobiaus. Depeus tenni fidi e serrai beni custu 2022 e cumentzai ateretantu su 2023”.

Finas oi su Casteddu est stetiu puniu de is faddinas suas: legiu aberu su corpu de conca de Capradossi po su 2-1 e su rigori cuncediu de Zappa po su 2-2. Po Pavoletti est s’indicu de una scuadra chi ancora si depit agatai: “Depeus essiri bravus comenti de scuadra, massimamenti nosu prus becius, a nosi donai una manu de agiudu. Candu calencunu sbagliat ddue depit essiri calencunu prontu. Immoi depeus andai a Palermo e fairi un’atra bataglia”.

 

 

 

Màuru Mura

 

 

Lunis, su 12 de Mesi de Idas de su 2022

 

 

 

Foto: https://www.perugiatoday.it/sport/calcio/perugia-sconfitto-3-2-a-cagliari.html