E duncas su bisu de su Marocco s’est frimau a unu passu. Ant essi sa Francia e s’Argentina a si giogai sa finali de is mondialis de fubalu in Qatar. S’atra dì s’Argentina de Messi at bintu sa cuntierra cun sa Croatzia po 3-0 et eris a merì sa Francia de Mbappé at fatu su matessi cun sa scuadra prus spantosa de custus mondialis, su Marocco, bincendu po 2-0. Lompint a sa finali is scuadras chi ant amostau prus fortza e gana de binciri. S’Argentina iat cumentzau mali meda perdendu sa prima partida cun s’Arabia, ma de tandu at cambiau registru e at arrangiau su caminu chi dd’at portada in finali. Lionel Messi s’at carrigau sa scuadra in is palas e at fatu biri a totu su mundu chini est: unu giogadori, de custus tempus, chena paragoni cun nemus. A ddu acostiai a Maradona est faddina manna, funt atrus tempus e cussu chi est stetiu Dieguito non tenit ogualis in su contu de su fubalu.
Sa Francia at tentu unu caminu prus regolari meda e sa stedda sua, Mbappé, at amostau totu is calidadis. Eris at sunfriu contras su Marocco, ma a s’acabbu de sa partida s’esperientzia de is francesus at fatu sa diferentzia.
Dificili a fairi unu pronosticu po sa finali, poita funt duas scuadras fortis, cun duas steddas, Messi e Mbappé, chi podint decidiri sa cuntierra cun d’una giogada spantosa. Sa Francia, arregodaus, est sa scuadra campioni in carriga e a binciri is mondialis po duas bortas de sighiu est sussediu, in sa storia, feti a s’Italia de Vitoriu Pozzo, in su 1934 e 1938, e a su Brasile de Pelè in su 1958 e in su 1962.
S’Argentina, de contu sou, est de trintases annus a immoi chi non bessit in su scaleri prus artu, fut su 1986 in Messico.
De seguru at essi, comenti de sempiri funt is finalis, una partida cun tatica meda e pagu spassiu, ma forsis ocannu cun cussus dus chi eus nau totu podit essi.
Màuru Mura
Giobia, su 15 de Mesi de Idas de su 2022
Foto: https://www.goal.com/it/liste/mondiali-2022-tabellone-semifinale-abbinamenti-contro-chi-gioca-brasile-argentina-francia-portogallo/bltd179fdf9b8af5ff5
