Sa discoteca de Murcia, aunia in su noti intru de sabudu e de dominigu funt mortus in trexi depiat abarrai serrada. Difatis, in su 2022, iat tentu cumandu de serrai po una meca de cosas chi non funt in regula.
Su numuru dus de su Cumunu de sa citadi, Antoni Navarro, at nau ca su Cumunu de Murcia iat donau cumandu cun d’una ordinantzia a sa serrada de sa discoteca in su mesi de gennargiu de su 2022 apustis airi bidu ca non fut in regula. A dogna manera, is meris de sa discoteca, iant inderetura fatu ricursu. De cussa dì, finas a sa tragedia de s’atra dì, sa discoteca fut oberta chena autorizatzioni. Intantis, a pustis bogis e bogis, is mortus contaus funt abarrau trexi, comenti at nau su prefetu Franciscu Jimenez. S’urtima personi chi non s’agataiat e pariat sparessiu s’agatat in domu de parentis e istat beni.
Immoi est polemica manna in is media spagnolus po mori ca su Cumunu de Murcia no at controllau. Né Antoni Navarro, de su Pp, e nemancu s’assessori de a innantis Andres Guerrero, de su Psoe, anti scipiu nai poita de candu iant donau su cumandu de serrai finas a sabudu passau nemus iat controllau chi s’ordini fut stetiu arrispetau.
“No est posssibili sciri chi unu locali est obertu o nou, finas chi s’agatat unu cumandu de serrada”, at nau su sindigu. In prus, comenti totus ant possiu cumprendiri finas in internet, s’account de Instagram de La Fonda at publicizau atobius medas in is urtimus mesis . E Murcia no est aici manna, ca contat prus o mancu cuatruxentus mila abitantis, aunia no est dificili meda a sciri chi unu locali est serrau o obertu.
No at a portai a torrai fairi a biviri is piciocus mortus, ma tocat a andai finas a fundu in su indagu, ca aici, forsis, in su benidori no ata sussediri prus.
Màuru Mura
Martis, su tres de mesi de ladamini de su 2023
Foto: https://www.heraldo.es/noticias/nacional/2023/10/01/sucesos-la-policia-nacional-confirma-muertos-encontrando-en-el-local-de-ocio-la-fonda-de-murcia-espana-1681202.html
