A su Milan bastat unu tempus de sa partida. Su Casteddu perdit mali cun sa scuadra de Stevini Pioli in San Siro in d’una partida chi no at tentu mai storia, mancu candu is piciocus de Semplici ant paregiau inderetura su gol de Tonali. In su Meazza de Milanu acabat po 4-1, cun is gol totus in su primu tempus: a Tonali, comenti eus nau, arrespundit Deiola e in segus Leao e Giroud po duas bortas decidint.

Semplici scioberat, comenti de sempiri, su 3-5-2 cun dus ominis nous pensendu a sa partida cun su Spezia, unu po obrigu ca Cragno non podiat giogai. Custus is ominis chi ant cumentzau sa partida: Radunovic, Ceppitelli, Godin, Carboni, Nandez, Deiola, Marin, Strootman, Dalbert, Joao Pedro, Pavoletti.

Su Milan at arrespustu cun is matessis giogadoris chi ant bintu in Genova cun sa Sampdoria lunis passau: Maignan, Calabria, Kjaer, Tomori, Theo Hernandez, Tonali, Krunic, Saelemaekers, Diaz, Leao, Giroud.

Ant, a pustis, giogau finas Pereiro Farias, Lykogiannis, Zappa e Ceter po su Casteddu e Bennacer, Rebic, Florenzi, Castillejo e Maldini po su Milan.

Semplici at chistionau cun is giornalistas: “Est tropu grai custu 4-1, finas chi tocat a nai ca su Milan si ddu at meritau, ca est una grandu scuadra. A nosu est  andau totu mali, a cumentzai de cussu tiru de Leao. Dispargit meda poita  podiaus e depiaus fairi meglius, ma castiu sa tassa mesu prena e pensu chi sa partida no est andada aici mali. Eus cicau de cambiai calencuna cosa passendu de su 3-5-2 a su 4-4-2, ma no est cambiau meda. Imoi depeus pensai de fairi erribai calencun’atru giogadori, ca seus ancora pesendudendi sa scuadra”.

Imoi su campionau si frimat po is partidas de s’Italia de Mancini e torrat a pigai su 12 de cabidanni cun sa partida contras de su Genoa de Ballardini, chi po imoi at giai perdiu duas partidas cun s’Inter e su Napoli.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://sport.virgilio.it/serie-a-milan-cagliari-4-1-le-foto-707180