Fut su 22 de maju, in Venetzia su Casteddu ce dda fait a non fairi mancu unu gol a una squadra giai retrocedia chi ndi pigaiait de sighiu de bintises partidas. Fut su 22 de maju, sa dì chi is sardus ant saludau sa serie A. Unu mesi de fatu, o pagu de prus, est giai mudau totu. Perunu spantu, poita su Ds Capozucca ddu iat nau giai una pariga de dis a pustis: “ Depeus cambiai su prus possibili”.
E custa borta a passai de is fueddus a is fatus, es stetiu facili e fatu coidendu. Poita is piciocus fatus giogai de Agostini in su “Penzo”, funt abarraus pagus. Cussu merì iant giogau Cragno in porta, Altare, Ceppitelli e Carboni in palas, Bellanova, Nandez, Grassi, Deiola e Lykogiannis in mesu de campu e Joao Pedro cun Pavoletti in denanti. De custus ant giai saludau Cepppitelli e Lykogiannis ca de pustis si podint acordai cun chine chi siat e in su mentris Grassi est torrau in Parma po s’acabbu de su prestitu. Finas Cragno e Carboni ant saludau e Bellanova e Joao Pedro funt acanta de ddu fairi, ma finas Nandez est postu a una parti, s’aspetat feti a chini ddu fairi meglius.
Una chistioni cuasi oguali po cussus chi furint intraus in cussa partida maledita: Marin parit chi siat giai de acordiu cun s’Empoli, Keita Baldé in Serie B non ci calat e Lovato est giai torrau a s’Atalanta. Rog si ndi podit andai a giogai de un’atra parti chena essiri bendiu in sa spera de si ddu torrai a tenni in scuadra ocannu chi benit, Pereiro s’iat a bolli fuiri, ma est presoneri de unu cuntratu mannu.
Chena si ndi scaresciri de cussus giogadoris chi torrant a domu insoru comenti Strootman e Dalbert e s’acabu de is cuntruatus de Ceter e Baselli, ma finas su dinari pigau de Empoli, Verona, Brugge e Spal po Vicario, Simeone, Siangue e Tripaldelli.
“Non podeus torrai a partiri cun 25 giogadoris nous, iat nau Capozucca, ma a su presidenti apu nau chi ia essi abarrau feti cambiendu su prus chi si podiat. Finas chi certus giogadoris no at essi facili a ddus bendiri”.
S’annu chi erribat at a partiri giai cun s’allenadori nou, Fabiu Liverani. E Liverani pensat a unu Casteddu nou finas comenti de giogu. Adiosu a su 3-5-2, si torrat a sa difesa a cuatru. A oi s’iat giogai cun Radunovic in porta, Zappa, Altare, Goldaniga e unu de comporai po sa manca in palas, In mesu de campu s’agatat, po immoi, feti Deiola, su capitanu nou, e in dennanti abarrat, sempiri po immoi Pavoletti cun Pereiro a manca e Tramoni, chi torrat de Brescia a dresta.. Su trabagliu po torrai a fairi su Casteddu nou est feti cumentzau.
29 de làmpadas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.corriere.it/sport/20_febbraio_14/fabio-liverani-l-intervista-figlio-una-rifugiata-somala-sto-parte-giusti-dd8121ae-4e9b-11ea-977d-98a8d6c00ea5.shtml
