“Nosi narant ca po s’obrigu de su Pos boleus fairi trassas po non pagai cun su bancomat e favoressiri s’evasioni. Su Guvernu est pensendu sa possibilidadi de non ponni in obrigu is cumerciantis a fairi pagamentus eletronicus po pagu cosa finas a sessanta eurus e non ddus boleus obrigai. Eus a biri comenti andat a acabbai chistionendu finas cun sa Comissioni Europea. Ma s’obrigu po dinari pagu po is butegheris est una pigada in giru”. Aici narat sa premier Giorgia Meloni, in d’unu videu in is social, su primu de sa rubrica noa chi tenit in conca de fairi e at batiau cun su nomini: “Gli appunti di Giorgia”.

“Su minimu de is sessanta eurus – sighit a nai sa Meloni – est un’indicu, po mei podit essiri fintzas prus bascia. De custu ndi depeus chistionai cun sa Comissioni Europea, poita sa chistioni de su pagamentu eletronicu est unu de is obietivus de su Pnrr, duncas tocat a biri comenti at andai a finiri sa chistioni”.

Is fueddus lompint a pustis sa publicatzioni in is social de una fotografia de unu cuadernu cun sa scrita: “Pronti ad aprire gli appunti di Giorgia?”.

“Obereus paris is cuadernus mius de trabbagliu. Beni agataus in su atobiu de unu de sa rubbrica #gliappuntidiGiorgia”, si ligit in su post, aunia, in dapoi, est sighiu unu videu aunia sa meri de Palazzo Chigi at amostau sa volontadi de cumpartziri cun totus su trabbagliu sou.

“Mi pregontant in medas poita tengiu sempiri unu cuadernu cun mei: ddu tengiu poita deu scriu totu cussu chi pensu, chi depu fairi, arrespustas a preguntas chi ligiu in is giornalis. In custus cuadeernus – at sighiu a nai – c’est totut su trabbagliu miu. Deu non tengiu perunu problema a cumpartziri su trabbagliu miu e is scioberus chi facu cun sa genti chi rapresentu, duncas apu decidiu de oberri su cuadernu miu in d’una rubbrica chi ia bollli fairi dogna cida, finas chi soi segura chi calencuna borta non ce dd’apa fairi. Po contai su trabbagliu chi eus fatu intru sa cida e donai calencuna arrespusta in pissu de is chistionis prus caglientis e de interessu mannu”.

 

 

Màuru Mura

 

 

 

Lunis, su 5 de Nadale de su 2022

 

 

 

Foto: https://www.zazoom.it/2022-12-04/meloni-inaugura-rubrica-gli-appunti-di-giorgia-molto-soddisfatta-di-quanto-fatto-finora/12025216/